Fara í efni
Menning

Soldið flatur stóll og fleiri fletir Árna Vil

Myndlistarmaðurinn Árni Vilhjálmsson, sem starfar undir listamannsnafninu Árni Vil, opnar sýninguna Soldið flatur stóll og fleiri fletir á Leyni við Hafnarstræti á morgun, laugardaginn 21. nóvember klukkan 20.

Á sýningunni kannar Árni möguleika málverksins með áherslu á form og liti á tvívíðum fleti. Verkin sækja meðal annars hugmyndir til náttúrunnar en reyna ekki að líkja eftir henni með hefðbundnum hætti. Þau eru ekki landslagsmyndir í eiginlegum skilningi heldur rannsókn á því hvernig hægt er að umbreyta náttúrulegum fyrirbærum í form og liti.

Í tilkynningu um sýninguna segir að verkin skorti alla dýpt og tilfinningu fyrir náttúrunni í hefðbundnum skilningi. Þau þykist ekki vera fjöll, grasbalar, himinn eða haf, heldur séu form og litir á flötum innan ramma. Þegar betur sé að gáð sé þó ekkert fullkomlega flatt.

Í verkunum verða fjöll meðal annars að samfélögum þar sem þorpsbúar setja lit sinn á umhverfið. Liturinn gegnir veigamiklu hlutverki og nöfn hans verða hluti af upplifuninni. Þar eru meðal annars notaðir litir úr litakorti Slippfélagsins og plastmálning í tískulitum. Með þeim hætti tengjast náttúra og hversdagslíf í myndrænum heimi þar sem litir og heiti þeirra skapa ákveðna dýpt án þess að flatneskjan hverfi.

Árni Vilhjálmsson er íslenskur myndlistarmaður með fjölbreyttan listrænan bakgrunn. Hann lauk BA-gráðu í myndlist frá Listaháskóla Íslands árið 2023 og hefur síðan þróað eigin myndræna nálgun og kannað möguleika málverksins.

Auk myndlistar hefur Árni reynslu af skapandi starfi á öðrum sviðum, meðal annars tónlist og sviðslistum, að því er fram kemur í upplýsingum um sýninguna. Sú reynsla endurspeglist í opnu viðhorfi hans til sköpunar og áhuga á ólíkum leiðum til listrænnar tjáningar.