Purrkur Pillnikk – Öllu gleymt og ekkert lært!

Hin goðsagnakennda hljómsveit Purrkur Pillnikk leikur í fyrsta skipti á Akureyri á laugardaginn, þegar hún heldur tónleika á Græna hattinum. Purrkurinn var mjög áberandi í eitt og hálft ár, 1981 og 1982; gaf á þeim tíma út ein 40 lög á fjórum plötun en lagði upp laupana og þráðurinn var ekki tekinn upp á nú fyrr fyrir rúmum þremur árum.

Hljómsveitina skipa Einar Örn Benediktsson söngvari, Bragi Ólafsson bassaleikari, gítarleikarinn Friðrik Erlingsson og Sigtryggur Baldursson trommuleikari. Ásgeir Bragason, sem lamdi húðir með Purrkinum á sínum tíma, féll frá árið 2015.

Í nóvember gefur hljómsveitin út plötuna „& aftur“ – það er dágóður tími á milli platna, 44 ár! „Ég veit ekki alveg hvar ég ætti að byrja,“ segir Einar Örn um það hvenær og hvers vegna hljómsveitin kom saman á ný. Nefnir þó árið 2023 þegar Purrkur Pillnikk fór í hljóðver til að taka upp fimm lög „sem aldrei voru tekin upp 1982. Þetta var lagabálkurinn Orð fyrir dauða. Í kjölfarið kom út samansafnskassinn Orð fyrir dauða sem hafði allt það sem hljómsveitin hafði gefið út.“

14 ný lög

„Okkur fannst nokkuð gaman að spila aftur saman þannig að við byrjuðum að semja ný lög,“ segir Einar Örn, „og höfum nú tekið upp nýja 14 laga plötu sem heitir „& aftur“. Af henni höfum við gefið út „læknir&svín“ og „annars góður“ og platan kemur út í nóvember.“

 

Tónleikar voru og eru enn mikilvægur þáttur fyrir Purrk Pillnikk, segir Einar Örn. „Nú liggur okkur kannski ekki eins mikið á, en höfum spilað nokkra tónleika einsog í Smekkleysu Plötubúð, Innipúkanum og í ár fórum við á Vagninn á Flateyri og svo núna á Græna hattinn. Við höfum aldrei spilað á Akureyri áður. Fyrir okkur er það einstakt að fá að koma á Græna og spila á tónleikum í höfuðborg norðursins.“

 

Tónleikar hljómsveitarinnar eru án nokkurs vafa tilhlökkunarefni í huga margra; en Einar Örn kveður með því að upplýsa blaðamann um nýtt slagorð hljómsveitarinnar: Öllu gleymt og ekkert lært!

 

 

Purrkur Pillnikk 2026. Frá vinstri: Bragi Ólafsson, Friðrik Erlingsson, Einar Örn Benediktsson og Sigtryggur Baldursson.