Myndir Agnesar og Lindu á sýningu í Hörpu

Akureyringarnir Agnes Heiða Skúladóttir og Linda Ólafsdóttir eru á meðal átta Íslendinga sem eiga myndir á norrænni ljósmyndasýningu sem opnuð var í Hörpu síðastliðinn föstudag, í tilefni 95 ára afmæli Ljósmyndarafélags Íslands.

Á sýningunni eru 45 verðlaunamyndir frá Íslandi, Danmörku, Noregi, Svíþjóð og Finnlandi. Efnt var til samkeppni félaga atvinnuljósmyndara í hverju landi. Í dómnefnd fyrir íslensku myndirnar sátu Tony Sweet frá Bandaríkjunum, Gabe McClintock frá Kanada og Line Loholt frá Noregi. Myndir átta íslenskra ljósmyndara voru valdar á sýninguna, sem fyrr segir.

Forseti Íslands, Guðni Th. Jóhannesson, opnaði sýninguna með formlegum hætti auk þess að veita íslenskum verðlaunahöfum sem eiga myndir á sýningunni viðurkenningar.

Eftirtaldir ljósmyndarar hlutu viðurkenningu:

• Heida HB í flokki landslagsmynda.
• Sigurður Ólafur Sigurðsson í flokka frétta- og heimildamynda.
• Aldís Pálsdóttir í flokki auglýsingamynda og í flokki portprettmynda.

Aðrir ljósmyndarar sem eiga mynd á sýningunni eru, auk Agnesar Heiðu og Lindu, Bragi Kort, Heiðdís Guðbjörg Gunnarsdóttir og Íris Stefánsdóttir.

Sýningin sem er opin almenningi á opnunartíma Hörpu stendur fram til fimmtudagsins 3. mars.