Limir í Myndlistafélaginu sýna fram i Føroyum

Félagar í Myndlistarfélaginu á Akureyri sýna nú verk sín í Gallerí Havnará í Þórshöfn í Færeyjum en sýningin var opnuð laugardaginn 13. september. Fyrirsögnin er á færeysku, einfaldlega vegna þess að það er skemmtilegra. Í frétt á vef félagsins segir að opnunardagurinn hafi verið fallegur, margmenni, stemning og gleði við opnun.

Upphafið að frekara samstarfi 

Stjórn Myndlistarfélagsins segir að sýningin sé fyrsta skrefið í samstarfi myndlistarmanna þessara tveggja landa, við systursamtök félagsins í Færeyjum, Føroysk Myndlistafólken. Sýningin mun standa til 21. september. „Sýningin heitir 'JÁ JÁ', en okkur barst til eyrna að Færeyingar kölluðu Íslendinga „Jáara“ og þannig varð titill sýningarinnar til,“ segir Brynhildur Kristinsdóttir, ein af listamönnunum sem sýna verk sín í Havnará. 

Færeyskir listamenn sýna á Akureyri

„Verkin eru fjölbreytt, hver og einn af 45 þátttakendum syngur með sínu nefi, en sýningin endurspeglar þá miklu grósku sem nú á sér stað í myndlist á Akureyri og nærsveitum,“ segir Brynhildur.„ Fimm félagar í  Føroysk Myndlistafólk opna síðan sýningu í Mjólkurbúðinni á Akureyrarvöku á næsta ári. Við væntum þess að þetta samstarf muni vaxa og dafna.“

Myndlistarfélagið á Akureyri er hagsmunasamtök myndlistarmanna á Akureyri. Félagið vinnur að því að efla umræðu um myndlist, auka þekkingu og fræðslu, koma á samvinnu við listamenn, hér á landi og erlendis, ásamt því að standa fyrir sýningum á verkum félaga Myndlistarfélagsins.

Myndlistarfélagið sér um rekstur Mjólkurbúðarinnar, sal Myndlistarfélagsins í Listagilinu á Akureyri og á þessu ári verða 25 sýningar og viðburðir í salnum. Samsýningar félagsmanna í Mjólkurbúðinni eru á Akureyrarvöku og fyrir jólin. Félagið er einnig í samstarfi við Menningarfélag Akureyrar og næsta sýning félagsins í Hofi er komin á dagskrá sumarið 2026.

Eftirtaldir listamenn eiga verk á sýningunni:

Aðalbjörg María Ólafsdóttir – Adda, Aðalheiður Sigríður Eysteinsdóttir, Aðalsteinn Þórsson, Anna Gunnarsdóttir, Anna Þóra Karlsdóttir, Arna Guðný Valsdóttir, Ásta Bára Pétursdóttir, Björg Eiríksdóttir, Borghildur Guðmundsdóttir, Brynja Harðardóttir Tveiten, Brynhildur Kristinsdóttir, Dagrún Matthíasdóttir, Egill Logi Jónasson, Elísabet Ásgríms, Erwin van der Werve, Gillian Pokalo, Guðbjörg Ringsted, Guðmundur Ármann Sigurjónsson Hadda Bjarnadóttir, Pálína Guðmundsdóttir, Hallgrímur Stefán Ingólfsson, Herdís Björk Þórðardóttir, Hjördís Frímann, Hlynur Hallsson, Hrafnhildur Ýr Denche, Hrefna Harðardóttir Jóna Bergdal Jakobsdóttir, Jonna Jónborg Sigurðardóttir, Jónína Björg Helgadóttir, Jónína Mjöll Þormóðsdóttir, Joris Rademaker, Karl Guðmundsson, Karólína Baldvinsdóttir, Kristján Helgason, Margrét Jónsdóttir, María Sigríður Jónsdóttir, Pia Rakel Sverrisdottir, Rebekka Kühnis, Rósa Júlíusdóttir, Rósa Njálsdóttir, Sigurður Mar, Stefan Bessason, Tereza Kocián, Thora Love, Thora Sólveig Bergsteinsdóttir.

SSNE, Myndlistasjóður, Smyril Line, Stefna, Rafeyri, Akureyrarbær, Norðurorka, Bilaleiga Akureyrar, Landsbankinn, Gallerí Havnará og  Føroysk Myndlistafólk styrkja verkefnið.

Fleiri myndir frá opnun sýningarinnar: