Fara í efni
Menning

Fyrirlestur um fálka og kynning á nýrri bók

Ljósmyndir: Daníel Bergmann
Ljósmyndir: Daníel Bergmann

Daníel Bergmann náttúruljósmyndari sendi nýverið frá sér bók um fálka. Hann heldur af því tilefni fyrirlestur um þennan magnaða fugl í Safnaðarheimili Akureyrarkirkju á fimmtudaginn, 17. nóvember, auk þess að kynna bókina. Samkoman hefst klukkan 20.00.

„Fálkinn er stærsti og glæsilegasti fulltrúi fálkaættarinnar. Hann er harðgerður ránfugl sem lifir nyrst á hjara veraldar í löndunum umhverfis Norðurheimskautið,“ segir í kynningu á bókinni.

„Fálkinn er sérhæfður ránfugl og háður rjúpunni sér til lífsviðurværis. Þetta sérstaka samband ránfugls og bráðar hefur orðið uppspretta kvæða og þjóðsagna. Á öldum áður voru fálkar fangaðir, fluttir úr landi og þjálfaðir til veiða. Íslenskir fálkar voru konungsgersemi og eftirsóttir af aðlinum í Evrópu til veiðileikja. Frá 1940 hefur fálkinn verið alfriðaður og sérstakt leyfi þarf til að nálgast hreiður hans á varptíma. Fálkinn var um tíma í skjaldarmerki þjóðarinnar og við hann er kennd fálkaorðan, æðsta heiðursmerki sem forseti Íslands veitir. Ókrýndur sem slíkur er fálkinn ótvíræður þjóðarfugl Íslendinga.“

Daníel Bergmann hefur fylgst með fálkum og ljósmyndað þá í náttúru Íslands í rúma tvo áratugi. „Aldrei áður hefur birst á prenti slíkt samansafn ljósmynda en í bókinni eru 115 myndir teknar á 23 ára tímabili. Myndirnar gefa innsýn í líf fálkans á öllum árstímum og þeim til stuðnings er margvíslegur fróðleikur og frásagnir af fálkum.“

Daníel Bergmann hóf að ljósmynda fálka sumarið 2000. Þau fyrstu kynni hans af fálkum voru upphafið af fjölmörgum heimsóknum á fálkaslóðir á Norðausturlandi. Smám saman varð til safn mynda sem gefa einstaka innsýn í líf fálkans á öllum árstímum. Bókin um fálkann er byggð á ljósmyndum sem teknar eru á 23 ára tímabili og er sú fyrsta sinnar tegundar sem gefin er út á Íslandi.

Ásamt því að ljósmynda landslag, fugla- og dýralíf á Íslandi og annars staðar á norðurslóðum hefur Daníel starfað sem leiðsögumaður ferðamanna í ljósmynda- og fuglaskoðunarferðum. Hann hefur einnig um árabil setið í stjórn Fuglaverndar og sinnt þar fræðslu- og útgáfumálum, m.a. sem ritstjóri tímaritsins Fuglar.