Menning

Forsetar lýðveldisins á nýrri gluggasýningu

Skapti Hallgrímsson - skapti@akureyri.net 16.06.2026 kl. 12:45

Listasysturnar Áslaug og Brynja Harðardætur Tveiten bjóða gestum og gangandi á gluggasýningu á vinnustofu þeirrar síðarnefndu í Hafnarstræti 88 þar sem m.a. má sjá embættismyndir af forsetum Íslands. Sýningin stendur til 22. júní „og er aðgengileg allan sólarhringinn þar sem hennar er notið utan frá séð. Systurnar hvetja alla sem eiga leið hjá að staldra við, gleðjast og rifja upp skemmtilegar minningar,“ segir í tilkynningu frá systrunum.

„Það er aldeilis að koma 17. júní. Við systur eru búnar að bjóða forsetum Íslands fyrr og síðar í kaffi sem borið er fram í mávastellinu. Þeir eru allir mættir með pompi og prakt og ætla að vera til og með 21. júní,“ segir Brynja á Facebook síðu sinni og bætir við: „Ekki nóg með að forsetarnir okkar fagni þjóðhátíðardeginum með okkur heldur ætla þeir líka að mæta í afmælið mitt 18. júní, halda upp á kvennréttindadaginn 19. júní og taka þátt í Hinsegin hátíð á Norðurlandi.“

Systurnar segja í tilkynningu um sýninguna:

Akureyri, 17. júní 1949

Mamma okkar var 7 ára. Fánar blöktu í sólríkri norðanáttinni og hún vildi ganga í takt við lúðraþyt, hlusta á karlakórinn á hátíðarsvæðinu og horfa á glímukeppnina.

Í tilefni dagsins ákvað fóstra mömmu að steikja pönnukökur. Mamma vildi iðulega fá að strá sykri yfir heitar pönnukökurnar og rúlla þeim upp nema að þessu sinni lét hún ekki sjá sig. Fóstra svipaðist um eftir mömmu sem hvorki sást tangur né tetur af. Um leið rak hún augun í að dökkblái sparihatturinn hennar með fjöðrunum, svo fínn að hann var meira stofustáss en til brúks, var ekki lengur á sínum stað.

Fóstra klæddi sig úr svuntunni, sléttaði yfir hárið og gekk áleiðis á ráðhústorg. Skömmu síðar sér hún mömmu valhoppandi útundan sér og viti menn með hattinn á höfðinu. Fóstra náði henni og ætlaði að byrsta sig við hana en þegar hún leit á kotroskna stelpuna sem sagði roggin „er ég ekki fín“ gat hún það ekki. Hún kímdi, tók í höndina á henni og þær héldu förinni áfram í takt við lúðraþytinn sem barst frá torginu enda skrúðgangan alveg að fara að byrja.

Systurnar hvetja þau sem eiga leið hjá Hafnarstræti 88 að staldra við, gleðjast og rifja upp skemmtilegar minningar. Og segja fólki að skrifa endilega í gestabókina sem er í rauðum póstkassa utan á húsinu, „og sækið ykkur kærleikshjarta sem fer vel í vasa eða er tilvalið til að gefa áfram.“

Til baka í yfirlit