Fara í efni
Menning

Er ódrepandi eins og rabarbari

Anna Richardsdóttir hefur gefið menningarlífi Akureyrar mikið en hún hefur starfað sem gjörningarlis…
Anna Richardsdóttir hefur gefið menningarlífi Akureyrar mikið en hún hefur starfað sem gjörningarlistakona á Akureyri frá árinu 1990. Ljósmyndir: Snæfríður Ingadóttir

Jaðartónlistarhátíðin „Mannfólkið breytist í slím“ fer fram á Akureyri um helgina. Hátíðin er haldin í gömlu iðnaðarhúsnæði við Óseyri; bátasmiðjan Vör var þar fyrst til húsa, til margra ára. Á setningarathöfn hátíðarinnar í gærkvöldi var listakonan Anna Richardsdóttir valin verndari hátíðarinnar í ár.

Anna tók við titlinum af listamanninum Snorra Ásmundssyni sem var verndari hátíðarinnar í fyrra. Anna hélt skemmtilega ræðu við tilefni þar sem hún líkti sér við rabarbara og sagðist vera ódrepandi eins og plantan lífseiga. „Ég elska að koma fram á óvæntum stöðum þar sem enginn býst við því , t.d út á götu, í gúmmíendurvinnslu, út í skógi, á vinnustöðum fólks í hádeginu og svo framvegis. Stundum verða til sögur í verkum mínum en alltaf er ríkulegt frelsi fyrir áhorfandann til að finna út hvað hann sér í verkinu,“ sagði Anna meðal annars í ræðu sinni.

Þetta er í fimmta sinn sem hátíðin er haldin og koma fimmtán tónlistartriði fram á hátíðinni í ár á tveimur kvöldum. Hátíðinni lýkur í kvöld og þá hefst dagskráin kl. 20. Heimilisfangið er Óseyri 16 og enginn aðgangseyrir er á hátíðina.

Tónlistarhátíðin Mannfólkið breytist í slím fer fram í mjög skemmtilegu húsnæði á Óseyri þar sem vítt er til veggja. Tónleikar kvöldsins byrja kl. 20.

Sultan á sviði.

Ragga Rix, yngsti tónlistarmaður hátíðarinnar, mætti til leiks á MBS í gærkvöldi.

Anna Richardsdóttir, verndari MBS, gaf viðstöddum rabarbara við setningarathöfnina.