Umfangsmikil æfing á flugvellinum í dag

Bæjarbúar hafa orðið varir við eitt og annað óvenjulegt á Akureyrarflugvelli undanfarna daga því búið er að koma fyrir gömlum bílum hér og þar á flugvallarsvæðinu og ýmsu öðru drasli ef að líkum lætur. Í dag verður heilmikið um að vera á vellinum, gera má ráð fyrir eldi, miklum reyk og mikilli umferð lögreglu-, sjúkra- og slökkviliðsbíla, björgunarsveita og starfsfólks Rauða krossins en ekkert er að óttast; ástæða þessa alls er umfangsmikil flugslysaæfing sem fer fram á milli klukkan 14 og 17. Æft verður „heildarferli aðgerða vegna flugslyss, með aðkomu helstu viðbragðsaðila innan sem utan flugvalarins. Settur verður upp slysavettvangur með: eldi, braki, förðuðum leikurum o.fl. til þess að skapa sem raunverulegastar aðstæður,“ segir í tilkynningu frá Isavia.