Þórsarar selja sæti til að fjármagna stúkuna

Þórsarar fjármagna sjálfir áhorfendastúkuna við nýjan gervigrasvöll félagsins, VÍS-völlinn á Ásnum, þar sem hún var ekki hluti af samningnum við Akureyrarbæ um uppbyggingu á svæðinu. Stúkan, sem tekur um 500 manns í sæti, kostar 15 milljónir króna og Þórsarar tóku upp á því að selja sæti til að fjármagna þennan nauðsynlega þátt verkefnisins og það gekk mjög vel, að sögn Sigurðar Pálssonar sem sá um málið fyrir hönd félagsins.

Hvert sæti kostar 100 þúsund krónur. „Ég er búinn að selja 123 sæti,“ sagði Sigurður Pálsson, „og enn er að bætast við, þeir sem hafa áhuga geta haft samband við mig.“ Hann hefur því safnað 12,3 milljónum hingað til og kveðst alsæll með viðtökurnar.

Um síðustu helgi boðaði Sigurður kaupendur á sinn fund í félagsheimilinu Hamri, þangað mætti hópur fólks sem keypt hafði sæti eða fulltrúar þeirra, til að velja sér stað í stúkunni. Margir keyptu í eigin nafni en einnig í nafni Þórsara sem eru látnir og dagurinn var „merkilegur“ að því leyti að umrædd sæti voru merkt með nafni.

Sigurður er afar þakklátur fyrir góð viðbrögð við þessari skemmtilegu fjáröflun og fyrir uppátækið mun hann nú hafa fengið nýtt gælunafn að sögn gárunganna – Siggi sæti ...

• Héðan í frá hafa eigendur eða fulltrúar þeirra forgang að merktu sæti þar til 15 mínútum fyrir leik.