SBA kaupir Mývatn Tours og eflir reksturinn

SBA Norðurleið hefur keypt Mývatn Tours, fyrirtæki sem í meira en 40 ár hefur staðið fyrir ferðum frá Mývatnssveit í Öskju og Herðubreiðarlindir. Kaupin gengu formlega í gegn í síðustu viku.

Mývatn Tours hefur um árabil verið eitt þekktasta fyrirtæki landsins í hálendisferðum á Norðausturlandi og boðið ferðamönnum upp á dagsferðir að Öskju, Víti, Drekagili og Herðubreiðarlindum yfir sumarmánuðina. 

„Við ætlum að reyna að poppa þetta aðeins upp, auka söluna í þessu og gera þetta lífvænlegra,“ segir Gunnar Magnús Gunnarsson, framkvæmdastjóri SBA, í samtali við akureyri.net. Segir hann að fyrirtækið Mývatn Tours hafi verið til sölu og að SBA hafi séð tækifæri í starfseminni og ætli sér að efla reksturinn.

Ferðum mun ekki fækka

Ferðirnar verða áfram farnar frá Mývatnssveit, líkt og verið hefur. Reksturinn er að mestu bundinn við júlí og ágúst þegar hálendisvegir eru opnir, þó að færð geti verið ótrygg framan af sumri. SBA keypti einnig snjótroðara sem notaður hefur verið þegar ófært er fyrir hefðbundnar bifreiðar inn á svæðið. „Það er stundum ekki orðið opið þarna upp eftir í byrjun júlí. Þá er fólk ferjað á snjótroðaranum,“ segir Gunnar.

Aðspurður segir hann ekki búið að ákveða hvort ferðum verði fjölgað, en þó sé ljóst að þær muni ekki dragast saman. „Þeim fækkar allavega ekki, þeim frekar fjölgar,“ segir hann. SBA hyggst jafnframt halda áfram að nýta nafnið Mývatn Tours. „Við keyptum vörumerkið líka, þannig að við getum auglýst undir báðum nöfnum,“ segir Gunnar. Hann segir að bókanir fyrir sumarið séu þegar mjög góðar og stefnt sé að því að samþætta starfsemina við bókunarkerfi SBA á næstunni.