Saga pasta á Íslandi er tiltölulega stutt

„Saga pasta á Íslandi er tiltölulega stutt. Elstu prentaðar tilvísanir til slíkra deigvara birtast undir lok 19. aldar, þegar makkarónur eru nefndar í íslenskum tímaritum. Þær virðast þó lengi hafa verið fremur sjaldgæf innflutningsvara og koma í verslunarauglýsingum gjarnan fyrir í sama vöruflokki og hrísgrjón, sagógrjón og aðrar grautarvörur.“

Þannig hefst síðari pistill Þráins Lárussonar um pasta sem akureyri.net birtir í dag. Fyrri pistillinn birtist fyrir viku.

Þráinn segir að á fyrri hluta 20. aldar verði makkarónur smám saman kunnuglegar í íslenskum heimildum „og fara að birtast í uppskriftum og matreiðsludálkum dagblaða og tímarita. Þær virðast þó fyrst og fremst hafa fest sig í sessi í einni tiltekinni útfærslu, makkarónugraut eða makkarónusúpu. “

Spaghetti fer að sjást oftar í íslenskum uppskriftum á sjöunda og áttunda áratugnum, segir hann, einkum sem meðlæti og þá gjarnan í tómatsósu. Úrval pastategunda er þó lengi mjög takmarkað og önnur pastaform lítt þekkt.

„Það er ekki fyrr en á níunda og tíunda áratugnum sem fjölbreyttara pasta fer að verða algengt í íslenskum verslunum og smám saman sjálfsagður hluti af matseðlum veitingahúsa.“

• Akureyringurinn Þráinn Lárusson er matreiðslumeistari og hefur í fjöldamörg ár verið áberandi sem athafnamaður í ferðaþjónustu á Austurlandi þar sem hann hefur rekið bæði veitingastaði og hótel. Hann skrifar fjölbreytta pistla um mat fyrir akureyri.net.

Pistill Þráins í dag: Pasta á Íslandi