Sá hæsti á sveinsprófi í pípulögnum er á flugi
Elfar Dúi Kristjánsson á Akureyri, sem útskrifaðist úr námi í pípulögnum frá Verkmenntaskólanum á Akureyri í desember síðastliðinum, náði bestum árangri á sveinsprófi í pípulögnum hér á landi að þessu sinni. Sveinsprófið var í janúar sl. Þetta kemur fram á vef VMA í dag.
Tilkynnt var hverjir hefðu skarað fram úr í hverri grein þegar Félag iðn- og tæknigreina í Reykjavík afhenti nýsveinum sveinsbréf 26. mars sl. og Elfar Dúi veitti síðan viðurkenningu viðtöku fyrir þennan frábæra árangur í Menningarhúsinu Hofi 10. maí sl. þegar sextíu nýsveinar í húsasmíði, pípulögnum og vélvirkjun fengu afhent sveinsbréf sín. Meistari Elfars Dúa var Hinrik Þórðarson, sem jafnframt var kennari hans í náminu í VMA.
Á vef VMA segir í dag: „Elfar Dúi er heldur betur fjölhæfur. Þrátt fyrir þennan afburða árangur í pípulögnum er hann ekki starfandi pípulagningamaður, hvað svo sem síðar kann að verða. Hann er flugmaður í fullu starfi, starfaði í sjúkrafluginu hjá Mýflugi en er nú flugstjóri í áætlunarflugi Norlandair. Sem sagt fljúgandi pípulagningamaður!“
