Ljós tendruð á jólatrjám í upphafi aðventu

Sunnudagurinn 30. nóvember er fyrsti sunnudagur í aðventu þetta árið og venju samkvæmt verða ljósin tendruð á jólatrjám víða um land í tilefni aðventunnar. Ýmiss konar dagskrá verður í boði á að minnsta kosti þremur stöðum í Akureyrarbæ um helgina í tilefni af upphafi aðventunnar.

Laugardaginn 29. nóvember kl. 16 verða ljósin tendruð á jólatrénu á Ráðhústorgi. Árum saman fengu bæjarbúar tréð að gjöf frá vinabænum Randers í Danmörku en frá árinu 2022 hefur tréð komið úr bæjarlandinu. Eftir sem áður verða ljósin á trénu tendruð með kærri kveðju frá vinum Akureyringa í Danmörku. Að þessu sinni er jólatréð ættað úr Kjarnaskógi og er tæplega 16 metra hátt sitkagreni.

Fjölbreytt dagskrá á Ráðhústorgi á laugardaginn

• Lúðrasveit Akureyrar spilar nokkur létt jólalög áður en formleg dagskrá hefst
• Söngkonan Jónína Björt og Hallgrímur Jónas flytja jólalög
• Jóla Lóla og félagar kíkja í heimsókn
• Barnakórar Akureyrarkirkju syngja fyrir gesti
• Jólasveinarnir mæta á svæðið og gleðja börnin
• Erik Vilstrup Lorenzen sendiherra Danmerkur og Ásthildur Sturludóttir bæjarstjóri ávarpa gesti og í ár er það hin þriggja ára Amanda Schmidt Jensdóttir sem mun tendra ljósin á jólatrénu.

Dagskrá lýkur kl. 17 en Jólatorgið verður opið áfram til kl. 18 þar sem söluaðilar í átta skreyttum jólahúsum verða með ýmsan varning til sölu.

Jólaljósin tendruð í Hrísey á sunnudaginn

Í Hrísey verða ljósin tendruð á jólatrénu á sunnudaginn kl. 16. Íbúar og gestir eru hvattir til að koma saman, gengið verður kringum jólatréð og jólalögin sungin. Eftir það verður bjóða ferðamálafélagið og Hríseyjarbúðin upp á smákökur og heitt súkkulaði í búðinni.

Á laugardaginn er síðan boðið upp á jólaföndur í Hríseyjarskóla kl. 13 og aðventustund verður í Hríseyjarkirkju kl. 16. Að henni lokinni verður kveikt á leiðalýsingu í kirkjugarðinum.

Ljósin kveikt á jólatré Glerártorgs á laugardaginn

Á Glerártorgi verða ljósin tendruð á jólatrénu laugardaginn 29. nóvember kl. 14 og þar er líka boðið upp á fjölbreytta dagskrá.

• Frítt candyfloss fyrir börnin frá kl. 13:30
• Jóla Lóla sér um að tendra ljósin á trénu og tekur jafnframt nokkur jólalög fyrir gesti
• Barnakór Akureyrarkirkju syngur jólalög
• Jólasveinarnir mæta í heimsókn og færa börnunum góðgæti
• Leikarar frá norðlenska atvinnuleikhópnum Umskiptingar kynna glænýja sýningu sem frumsýnd verður 5. desember
• Rauði krossinn verður á staðnum og selur Velferðarstjörnuna, sem er seld til styrktar Velferðarsjóði Eyjafjarðar

Það verður því nóg við að vera þessa fyrstu aðventuhelgi og fleiri viðburði má sjá í upptalningu í menningarvikuyfirferð akureyri.net.