Íshokkí, körfubolti, handbolti og blak
Íþróttavikan er með rólegra móti miðað við það sem verið hefur að undanförnu. Knattspyrnutímabilinu er lokið, karlaliðin í handbolta í landsliðsfríi og fríhelgi fram undan hjá karlaliðinu í íshokkí eftir tvær mjög strembnar helgar að undanförnu. Á dagskrá er hins vegar íshokkíleikur kvenna, körfubolti hjá báðum Þórsliðunum, tveir handboltaleikir hjá KA/Þór, í Powerade-bikarnum og í Olísdeild kvenna og blakleikur hjá körlunum. Alltaf eitthvað.
ÞRIÐJUDAGUR 28. OKTÓBER - íshokkí
Kvennalið SA hefur farið vel af stað í Toppdeildinni í íshokkíinu og í kvöld er komið að útileik gegn Fjölni í Egilshöllinni. SA er með 11 stig í efsta sæti deildarinnar, hefur spilað fjóra leiki og unnið þá alla, þar af einn í framlengingu. SR er með sjö stig og Fjölnir án stiga.
- Toppdeild kvenna í íshokkí
Egilshöllin kl. 20
Fjölnir - SA
MIÐVIKUDAGUR 29. OKTÓBER - handbolti
Bikarkeppni kvenna í handknattleik, Powerade-bikarinn, hefst í vikunni með sex leikjum í fyrstu umferð keppninnar, 16 liða úrslitum. Raunar eru bara 12 lið sem spila í 16 liða úrslitunum því Íslandsmeistarar Vals og bikarmeistarar Hauka sitja hjá og koma inn í átta liða úrslitin.
Fyrstu leikir 16 liða úrslitanna verða spilaðir í dag, þriðjudag, en KA/Þór á heimaleik á morgun, miðvikudag, fær þá Selfyssinga í heimókn í KA-heimilið.
- Powerade-bikarinn í handknattleik kvenna
KA-heimilið kl. 18:30
KA/Þór - Selfoss
FÖSTUDAGUR 31. OKTÓBER - körfubolti
Gengi karlaliðs Þórs í körfuknattleik hefur ekki verið gott það sem af er keppnistímabili, þrjú töp í deildinni og eitt í bikarkeppninni hingað til. Á föstudag er komið að heimaleik gegn KV, sem er eitt þriggja liða ásamt Þór og Skallagrími sem eru í botnsætunum án sigurs í fyrstu þremur umferðunum.
- 1. deild karla í körfuknattleik
Íþróttahöllin á Akureyri kl. 19:15
Þór - KV
LAUGARDAGUR 1. NÓVEMBER - handbolti, körfubolti
KA/Þór byrjaði Íslandsmótið af krafti, vann fyrstu þrjá leikina, tapaði síðan tveimur, en vann síðan Fram á útivelli í sjöttu umferðinni og situr í 2. sæti deildarinnar með átta stig, eins og ÍR og ÍBV, en tveimur stigum á eftir Val sem er í toppsætinu. Á laugardag er komið að heimsókn í Garðabæinn, en Stjarnan vermir botnsætið og er án stiga eftir fyrstu sex umferðirnar.
- Olísdeild kvenna í handknattleik
Hekluhöllin í Garðabæ kl. 15:30
Stjarnan - KA/Þór
- - -
Kvennalið Þórs í körfuknattleik hefur unnið fyrstu tvo leiki sína í 1. deildinni, fyrst stórsigur gegn B-liði Njarðvíkur og svo útisigur gegn Aþenu um liðna helgi. Á laugardag taka Þórsstelpurnar á móti liði Fjölnis, sem er með tvo sigra í þremur leikjum, hafa unnið ÍR og B-lið Njarðvíkur, en töpuðu fyrir Aþenu.
- 1. deild kvenna í körfuknattleik
Íþróttahöllin á Akureyri kl. 18
Þór - Fjölnir
SUNNUDAGUR 2. NÓVEMBER - blak
KA er í 2. sæti deildarinnar með 15 stig eftir sex leiki, en Hamar hefur leikið einum leik meira og er á toppnum með 17 stig. Mótherjar KA eru hins vegar á botninum án stiga eftir sex leiki.
- Unbroken-deild karla í blaki
KA-heimilið kl. 14
KA - HK
- - -
Lesendur eru hvattir til að minna á íþróttaviðburði hvers kyns sem fram undan eru í meistaraflokkum, sérstaklega ef eitthvað verður út undan og gleymist í þessari vikulegu yfirferð í vikubyrjun hér á akureyri.net - sendið tölvupóst í haraldur@akureyri.net ef koma þarf slíkum upplýsingum á framfæri.
