Mannlíf
Hetjurnar njóta aftur góðs af „Sjally Pally“
07.04.2026 kl. 17:00
Ein milljón, gjörið svo vel! Söfnunarféð afhent í fyrra, frá vinstri: Viðar Valdimarsson meðstjórnandi í píludeild Þórs, Helga Ósk meðstjórnandi í Hetjunum, Tinna Hermannsdóttir, formaður Hetjanna og Davíð Örn Oddsson, formaður píludeildar Þórs.
Píludeild Þórs endurtekur leikinn frá því á síðasta ári og stendur fyrir góðgerðarleik í tengslum við opna Akureyrarmótið sem haldið verður í Sjallanum um næstu helgi, á föstudag og laugardag. Í fyrra færði píludeildin Hetjunum – félagi langveikra barna á Norðurlandi, eina milljón króna að gjöf eftir mótið og það fé sem safnast í góðgerðarleiknum nú rennur aftur til Hetjanna.
Opna Akureyrarmótið í Sjallanum er fjölmennasta pílumót landsins ár hvert – kallað Sjally Pally, með vísan í sjálft heimsmeistaramótið sem jafnan fer fram í Alexandra Palace í London, Ally Pally.
Hæsta mögulega skor sem hægt er að fá í pílu er 180, þegar öllum þremur pílum í hverri umferð er kastað í reit sem kallast þrefaldur 20. Í hvert skipti sem keppandi nær 180 á Sjally Pally tryggir hann Hetjunum 5.000 krónur, þökk sé fjórum styrktaraðilum sem píludeildin hefur samið við; það eru Eyjabiti, Tengir, Coca Cola og Skógarböðin.
Í fyrra náðu keppendur 180 stigum í 116 skipti. Þar með söfnuðust 580 þúsund krónur en styrktaraðilarnir bættu um betur og hækkuðu upphæðina í eina milljón. Þórsarar binda vonir við að keppendur nái 180 stigum oftar en í fyrra. „Nú setjum við traustið yfir á keppendur að safna sem mestum pening í góðgerðarmál!“ segir í tilkynningu frá píludeildinni.
