Götulokanir í miðbæ um helgar fram að jólum

Götulokanir verða í miðbænum á laugardögum og sunnudögum kl. 14-19 fram að jólum í tengslum við Jólatorgið á Ráðhústorgi og viðburði sem þar eru á dagskrá.

Eftirtaldar götur verða lokaðar: Hafnarstræti (göngugatan) frá Kaupvangsstræti að Brekkugötu, Ráðhústorg, Túngata, Strandgata frá Nýja bíói að Ráðhústorgi og Skipagata frá Hofsbót að Strandgötu, eins og sjá má á myndinni sem fylgir fréttinni. 

Lokanirnar verða í gildi kl. 14-19 allar helgar fram að jólum, það er á laugardögum og sunnudögum, frá og með deginum í dag. 

Jólatorgið á Ráðhústorgi verður opnað í dag kl. 15 og ljósin á jólatrénu á Ráðhústorgi tendruð við hátíðlega athöfn kl. 16. „Með Jólatorginu verður sköpuð hátíðleg aðventustemning á Ráðhústorgi. Þar verður til sölu ýmis varningur sem yfirleitt tengist hátíðarhöldunum og boðið upp á dagskrá fyrir börn og fullorðna þá daga sem Jólatorgið er opið,“ segir í tilkynningu Akureyrarbæjar.

Upplýsingar um Jólatorgið má finna á jólatorg.is..