Afmælisveisla listasystra allan apríl í glugganum

Í tilefni af barnamenningarhátíð, páskum og sumardeginum fyrsta í apríl setja listasysturnar Áslaug og Brynja Harðardætur Tveiten upp gluggasýningu á vinnustofu þeirrar síðarnefndu í Hafnarstræti 88.

„Boðið er í fjórfalt afmæli, bangsa-, dúkku-, dýra- og barnaafmæli. Það glittir í sumarkomuna, sætar kökur og snúða á uppdekkuðum borðum og gjafirnar eru ekki af verri endanum, ýmis leikföng og annað góss,“ segir í tilkynningu frá þeim systrum. „Efniviður sýningarinnar er endurnýtt dót m.a. frá skrautmunasölunni Fröken Blómfríður og nytjamörkuðum. Sýningin er kjörinn áfangastaður í gönguferðum, gott tækifæri til að staldra við, leika sér og vekur eflaust upp forvitni og gleði hjá vegfarendum.“

Systurnar spyrja:

• Hvað eru bangsarnir margir? En dúkkurnar?
• Hvaða dýr sérðu? Áttu uppáhalds dýr?
• Hvar eru kisurnar í dúkkuhúsinu?
• Hverjir eiga afmæli og hvað er í litlu pökkunum?
• Hvaða bragð skyldi vera af kökunum og hvað eru kertin mörg?
• Hvað eru dýrin að bralla, af hverju er barbídúkkan í rauða sófanum bara í einu stígvéli, eru Jón Oddur og Jón Bjarni í veislunni?

Að endingu segja þær:

• Veljið hlut í huganum og farið í ´falin hlut´.

„Gleðilega páska, gleðilega barnamenningarhátíð og gleðilegt sumar.“