Úrslitaeinvígi kvenna í blaki hefst í kvöld

Kvennalið KA í blaki vann Völsung í oddaleik í undanúrslitum Íslandsmótsins í liðinni viku og mætir HK í úrslitaeinvíginu. HK vann deildarmeistaratitilinn og hefst einvígið því í Kópavoginum. Fyrsti leikur er í Digranesi í kvöld, en vinna þarf þrjá leiki til að vinna titilinn.

KA vann alla fjóra titlana í blaki kvenna á síðustu leiktíð, meistarar meistaranna, bikarmeistarar, deildarmeistarar og Íslandsmeistarar. Tímabilið hófst síðastliðið haust með því að KA vann titilinn meistarar meistaranna. Síðan þá eru tveir bikarar farnir í Kópavoginn, HK varð bæði bikar- og deildarmeistari á dögunum.

• Úrslitakeppni Unbroken-deildar kvenna í blaki
  Digranes í Kópavogi kl. 18
  HK - KA
• Útsending: Livey.events
  Áskrift að rás eða stökum leikjum

HK vann allar viðureignirnar við KA í deildinni í vetur, 3-0 og 3-1 á Akureyri í desember, og síðan 3-2 og 3-1 í lokaleikjum deildarinnar í byrjun mars. Þessi lið mættust einnig í úrslitum bikarkeppninnar, Kjörísbikarsins. HK vann þá viðureign 3-1.

Það verður því eflaust við ramman reip að draga hjá KA-liðinu enda er HK með sterkt lið og margar landsliðskonur í sínum röðum. En þegar komið er alla leið í úrslitaeinvígi um Íslandsmeistaratitilinn getur allt gerst.