Nökkvi kominn í hóp fyrirmyndarfélaga ÍSÍ

Siglingaklúbburinn Nökkvi á Akureyri fékk í gær viðurkenningu sem fyrirmyndarfélag Íþrótta- og ólympíusambands Íslands (ÍSÍ). Nökkvi hefur lengi stefnt að þessari viðurkenningu og hún varð að veruleika þegar Viðar Sigurjónsson, skrifstofustjóri ÍSÍ á Akureyri, afhenti Tryggva Jóhanni Heimissyni formanni Nökkva viðurkenninguna og fána fyrirmyndarfélaga.

Til að verða fyrirmyndarfélag þarf að uppfylla ýmiskonar skilyrði sem lúta að starfsemi félags og stefnu í nokkrum málaflokkum, svo sem fræðslu- og forvarnarmálum, jafnréttismálum, umhverfismálum, persónuverndarmálum, menntun þjálfara og siðareglum.