Handbolti: Öruggur sigur KA gegn ÍBV

KA tók á móti ÍBV í kvöld í efstu deild karla í handknattleik, Olísdeildinni, og vann öruggan 31:25 sigur. Eftir tiltölulega jafnan fyrri hálfleik áttu Eyjamenn ekkert svar við góðum leik KA-manna í seinni hálfleik. KA fylgir Haukum eftir eins og skugginn í toppbaráttu deildarinnar.

Í fyrri hálfleik var jafnt á nánast öllum tölum lengi framan ef en KA þó yfirleitt á undan að skora. Undir lok hálfleiksins sigu KA-menn þó framúr og náðu þriggja marka forystu en ÍBV skoraði síðasta mark hálfleiksins og því var forskotið bara tvö mörk í leikhléi, 13:11.

KA skoraði fyrstu tvö mörk seinni hálfleiks og náðu þægilegri forystu sem gestunum tókst aldrei að vinna upp. KA-liðið var mun betra en ÍBV og mestur varð munurinn 8 mörk, 24:16, um miðjan seinni hálfleikinn. Eftir þetta var sigurinn aldrei í hættu og lokatölur 31:25 eins og áður sagði.

KA í 2. sæti með 4 sigra í 5 leikjum

Dagur Árni Heimisson hefur skorað mest KA-manna það sem af er móti og hann var markahæstur með 11 mörk, flest þeirra reyndar úr víti. Dagur Gautason og Jens Bragi Bergþórsson komu næstir þar á eftir og nýttu færi sín mjög vel. Jens Bragi átti auk þess góðan leik í vörninni og þeir Daníel Matthíasson stöðvuðu ófáar sóknarlotur gestanna. Markvarsla KA var líka mun betri en gestanna en Ágúst Elí Björgvinsson varði 20 af þeim 45 skotum sem Eyjamenn komu á markið.