Frábær leikur Emmu í sigri á Úkraínu
Íslenska U18 landslið kvenna í körfuknattleik hefur tryggt sér sæti í átta liða úrslitum B-deildar EuroBasket. Liðið vann þrjá leiki af fimm í riðlakeppninni og raðast í 2. sætið á eftir Litháen, en efst þriggja jafnra liða með mun betri stigamun en Aserbaijan og Úkraína.
- Leikir Íslands í C-riðli
Ísland - Litháen 73-99
Ísland - Bosnía og Herzegovína 110-77
Ísland - Kósóvó 82-50
Ísland - Aserbæsjan 86-79
Ísland - Úkraína 96-71
Þórsarinn Emma Karólína Snæbjarnardóttir fór mikinn í mikilvægum sigri á Úkraínu í lokaleik liðsins í riðlinum þar sem sætið í átta liða úrslitum var tryggt. Emma skoraði 16 stig í leiknum, tók fjögur fráköst, átti sex stoðsendingar, stal fimm boltum og varði eitt skot. Hún spilaði í 28 mínútur og 33 sekúndur, skilaði 21 framlagsstigi og var með +32, sem þýðir að liðið skoraði 32 stigum meira en andstæðingurinn á þeim mínútum sem hún spilaði.
Átta liða úrslitin verða spiluð á föstudag, 11. júlí.
U18 landslið Íslands í körfuknattleik. Emma Karólína er önnur frá vinstri í öftustu röð. Mynd: KKÍ.
