Fara í efni
Íþróttir

Fjórir ungir SA-ingar snúa heim til Akureyrar

Berglind Leifsdóttir, Unnar Hafberg Rúnarsson, Gunnar Arason og Axel Orongan.
Berglind Leifsdóttir, Unnar Hafberg Rúnarsson, Gunnar Arason og Axel Orongan.

Gengið hefur verið frá félagaskiptum fyrir fjóra unga íshokkíleikmenn, sem uppaldir eru í Skautafélagi Akureyrar, en snúa nú heim frá félagsliðum í Svþjóð og ætla að taka slaginn með Skautafélagi Akureyrar í vetur. Þetta eru Axel Orongan, Gunnar Arason, Unnar Hafberg Rúnarson og Berglind Leifsdóttir. Frá þessu var greint á heimasíðu SA í gær. „Þetta er vissulega mikill hvalreki fyrir SA enda öll mjög efnilegir íshokkíleikmenn,“ segir þar.

Ástæða heimkomu leikmannanna er kórónuveirufaldurinn og sóttvarnarráðstafanir í Svíþjóð. Eins og fram kemur á heimasíðu SA er ástandið ekki gott í Svíþjóð og óvíst hvort og þá hve margir leikir verða spilaðir þar í vetur. „Leikmennirnir okkar sem snúa nú heim eru þrátt fyrir ungan aldur orðnir mjög öflugir leikmenn sem koma til með að styrkja meistaraflokka félagsins og verður spennandi að fylgjast með þeim í komandi leikjum.“

Axel Orongan er 19 ára sóknarmaður sem hefur spilað fyrir Nyköpings SKJ20 í Svíþjóð i vetur. Axel hefur spilað erlendis frá 15 ára aldri með liðum bæði í Svíþjóð og Bandaríkjunum. Axel hefur staðið sig vel með A-landsliði Íslands á síðustu mótum og var á meðal stigahæstu leikmanna liðsins á síðasta heimsmeistaramóti, segir á heimasíðu SA. Hann hefur einnig verið öflugur með unglingalandsliðum Íslands og var stigahæsti leikmaður heimsmeistaramóts U20 liða í 3. deild á síðasta ári, þar sem hann var valinn besti sóknarmaður mótsins.

Gunnar Arason er 19 ára varnarmaður sem einnig spilaði fyrir Nyköpings SKJ20 í Svíþjóð í vetur. „Gunnar er einn allra efnilegasti varnarmaður landsins en hann var fyrirliði U20 landsliðs Íslands sem vann gull í III deild í janúar 2020 og hefur einnig spilað 8 leiki með karlalandsliði Íslands,“ segir á SA-síðunni. Gunnar lék með framhaldsskólaliði í Kanada síðastliðinn vetur en hafði þar áður spilað þrjú tímabil í meistaraflokki með SA Víkingum.

Unnar Hafberg Rúnarson er 18 ára sóknarmaður sem kemur frá Sollentuna U20 í Svíþjóð en hann hefur spilað fyrir félagslið í Svíþjóð síðastliðin þrjú tímabil. Unnar er öflugur sóknarmaður og spilaði með U20 landsliði Íslands á síðasta tímabili. Unnar á ekki langt að sækja hæfileikana því hann er sonur Rúnars Freys Rúnarssonar, yfirþjálfara SA og margfalds Íslandsmeistara.

Berglind Leifsdóttir er 20 ára sóknarmaður sem kemur frá Troja/Ljungby í næst efstu deild í Svíþjóð. Berglind var á sínu fyrsta tímabili í Svíþjóð í vetur en hafði áður verið einn öflugasti sóknarleikmaður Hertz-deildarinnar, að því er segir á heimasíðu SA. Hún hefur spilað 15 A-landsleiki fyrir Ísland.