Fimm heimaleikir í fjórum íþróttagreinum

Framboðið á íþróttakappleikjum Akureyrarliða þessa vikuna þjappast á tvo daga, laugardag og sunnudag. Tveir blakleikir, íshokkí, körfubolti og handbolti á heimavöllum og einn körfuboltaleikur á útivelli.

• Blakáhugafólk fær svokallaðan tvíhöfða í KA-heimilinu á laugardag þegar karla- og kvennalið KA mæta liðum HK úr Kópavogi. Karlaliðin spila fyrri leik dagsins. Bæði KA og HK hafa átt í smá basli með stigasöfnun í upphafi móts, KA með einn sigur og HK engan, en bæði lið hafa spilað fimm leiki. KA er í fimmta sæti Unbroken-deildarinnar með fimm stig, þar sem liðið hefur unnið einn leik og tvívegis tapað 2-3 í hrinum talið. En HK er án stiga á botninum, hefur fimm fyrstu leikjum sínum ýmist 1-3 eða 0-3.
• Seinni blakleikur laugardagsins verður toppleikur í Unbroken-deild kvenna. Íslandsmeistarar HK koma norður, en Kópavogsliðið er í efsta sæti deildarinnar með 15 stig að loknum fimm leikjum. KA er í 2. sætinu með 12 stig, en hefur leikið einum leik færra en HK. Bæði lið eru taplaus það sem af er keppnistímabilinu og má því búast við hörkuviðureign í KA-heimilinu á laugardag.
• Kvennalið Þórs í körfubolta hefur verið á ágætu skriði í undanförnum leikjum eftir naumt tap í fyrsta leik tímabilsins. Þrjú efstu lið deildarinnar hafa öll tapað einum leik, en Selfoss er á toppnum með fjóra sigra í fimm leikjum og þar á eftir koma bæði Þórsliðin, úr Þorlákshöfn og frá Akureyri, með þrjá sigra í fyrstu fjórum leikjum sínum. Keflavík b hefur spilað þrjá leiki og unnið þá alla, er eina taplausa lið deildarinnar. Þór sækir B-lið Njarðvíkur heim á laugardag. Njarðvíkingar eru í 9. sæti deildarinnar, hafa unnið einn af fyrstu þremur leikjum sínum.
• Kvennalið Skautafélags Akureyrar í íshokkí hefur byrjað tímabilið afar vel og er komið með gott forskot á toppi Toppdeildarinnar. SA hefur tíu stig eftir fjóra leiki, en SR kemur næst með þrjú stig úr fyrstu fjórum leikjum sínum. Fjölnir hefur aðeins spilað tvo leiki og er með tvö stig í þriðja sætinu. Lið Fjölnis kemur einmitt norður á laugardag og mætir SA í Skautahöllinni á Akureyri. Fjölnir vann SR í síðasta leik sínum, í sögulegum leik sem fór í framlengingu og vítakeppni þar sem samtals þurfti 42 vítaskot til að ráða úrslitunum.
• Karlalið Þórs í körfubolta tekur á móti liði KFG í sjöttu umferð 1. deildar karla á sunnudag. Þórsliðið hefur aðeins unið einn leik af fyrstu fimm leikjum sínum í deildinni og er í 9. sæti. Snæfell og Fjölnir eru í sætunum fyrir neðan, einnig með einn sigur, en Skallagrímur er á botninum með fimm töp. Andstæðingar Þórs í næsta leik, KFG, eru í 4. sæti deildarinnar, en liðið hefur unnið fjóra af fyrstu fimm leikjum sínum í deildinni.
• KA/Þór hefur unnið tvo leiki í röð í Olísdeild kvenna í handknattleik, en liðið tapaði fyrstu fimm leikjum sínum áður en loks komu sigrar á móti Stjörnunni og HK. Það eru einmitt liðin sem eru fyrir neðan KA/Þór í töflunni, bæði með tvö stig. KA/Þór er í 8. sætinu með fjögur stig. Næsti leikur liðsins er heimaleikur gegn Fram á sunnudag. Fram er í 5. sæti deildarinnar með átta stig úr fyrstu sjö leikjunum.