Fara í efni
Íþróttir

Fagleg, lýðræðisleg skipulagsmál eru framtíðin

Skipulagsmál á Akureyri hafa verið mikið til umræðu síðustu misseri. Því miður hefur staða þeirra ekki verið nægilega jákvæð í hugum bæjarbúa. Má segja að málaflokkurinn hafi fengið falleinkun í könnun fyrir nokkru.

Af hverju er staðan þessi ? Við sem höfum fylgst með umræðunni erum ekki hissa. Sérstaklega hafa tvö mál skekið umræðuna. Áform um háhýsi á Tanganum var gerræðisleg ákvörðu n að frumkvæði verktaka sem átti hluta af svæðinu og lét vinna þar deiliskipulag sem stóðst enga skoðun. Þarf ekki að ræða það meira því bæjarbúar sendu bæjaryfirvöldum rauða spaldið og fallið var frá deiliskipulagbreytingunni eftir íbúakosningu.

Annað mál, fyrirhuguð háhýsabyggð við Tónatröð, sem er að mati flestra, alveg úr öllum takti við umhverfið, samráð ekkert og úthlutun svæðis til verktaka siðlaus og utan leikreglna. Það mál er í vinnslu. Margir hafa spurt mig, hvar er málið statt? Ætla bæjaryfirvöld að keyra málið til enda þrátt fyrir vel rökstudda andstöðu ?

Ég er á framboðslista Samfylkingarinnar á Akureyri og í þeim hópi er skýr sýn á framhaldið og hvernig beri að vinna í skipulagsmálum. Það er lífnauðsyn að endurvinna traust bæjarbúa í málaflokknum.

Samfylkingin vill

  • Við viljum byggja upp á Oddeyrinni í samræmi við samþykkt rammaskipulag Oddeyrar þannig að framtíðarbyggð þróist þar í sátt íbúa og taki mið af staðaranda og sögu svæðisins.
  • Um Tónatröð höfum við verið alveg skýr og höfum bókað andstöðu okkar ítrekað við lóðaúthlutunarferlið í tengslum við það verkefni sem er þar í gangi núna.

Skýrara verður það varla. Fagleg vinnubrögð, íbúasamráð og vinna í sátt við umhverfið, söguna og menninguna. Burt með áform um háhýsabyggð við Tónatröð. Burt með ólýðræðisleg og óvönduð vinnubrögð.

Við höfnum þeim ófaglegu og ólýðræðslegu vinnubrögðum sem bæjarbúar hafa upplifað um hríð og viljum endurheimta traust á skipulagsmálum.

Í þeim málaflokki viljum við sjá lýðræðisleg og vönduð vinnubrögð í framtíðinni.

Þar eiga að ráða hagsmunir Akureyrar og bæjarbúa en ekki gróðasjónarmið verktaka. Við eigum sjálf að móta okkar skipulag.

Vandað samráð er lykillinn að farsælli niðurstöðu í skipulagsmálum.

Áfram Akureyri.

Jón Ingi Cæsarsson er í 20. sæti á framboðslista Samfylkingarinnar á Akureyri.

 

Ljósmynd: Jón Ingi Cæsarsson