Vilhjálmur Bragason valinn bæjarlistamaður

Vilhjálmur Bergmann Bragason, leikari, tónlistarmaður og höfundur var valinn bæjarlistamaður Akureyrar árið 2026. Það var kunngjört á Vorkomu Akureyrarbæjar, árlegri samkomu sem haldin var í Menningarhúsinu Hofi í gær. Heiðursviðurkenningu Menningarsjóðs Akureyrarbæjar 2026 hlaut Kristín Aðalsteinsdóttir „fyrir mikilsvert framlag sitt til menningar og mennta á Akureyri og ekki síst fyrir skráningu og varðveislu á menningararfi Akureyrar og Norðurlands,“ eins og segir í tilkynningu frá sveitarfélaginu.

Á hátt í 20 ára ferli hefur Vilhjálmur látið til sín taka á afar breiðu sviði listar; „hvort sem um er að ræða tónlist, leiklist, leikstjórn, handritagerð eða þýðingar og hefur hann sett áþreifanlegt mark sitt á listalíf á Akureyri sem og á landsvísu,“ segir í tilkynningunni.

• Sumarlistamaður Akureyrar 2026 er Mahaut Ingiríður Matharel, „ungur hörpuleikari sem á framtíðina svo sannarlega fyrir sér,“ segir í tilkynningu frá Akureyrarbæ.
• Feðgarnir og arkitektarnir Geirharður Þorsteinsson, heitinn, og Þorsteinn Geirharðsson hlutu Byggingarlistarverðlaun Akureyrarbæjar fyrir Verkmenntaskólann á Akureyri. „Rík næmni fyrir fegurð einfaldleikans og skilningi fyrir formun hússins undir starfsemi verk- og bóknáms eru meginrök faghóps fyrir vali á arkitektunum sem handhöfum byggingarlistaverðlauna Akureyrarbæjar fyrir árið 2026.“

Mannréttindaviðurkenningum Akureyrarbæjar er ætlað að auka sýnileika þeirra verkefna sem lúta að velferð innan samfélagsins og veita þakkir fyrir framlag í þágu þess:

• Viðurkenningu í flokki félagasamtaka hlýtur almannaheillafélagið Vonarbrú fyrir mannúðarstarf á Gasa. Kristín Bjarnadóttir er stofnandi félagsins.
• Viðurkenningu í flokki einstaklinga hlýtur Sæunn Ísfeld Guðmundsdóttir. „Sæunni var veitt viðurkenning fyrir störf sín í þágu samfélagsins. Þau störf lúta að óeigingjörnu sjálfboðaliðastarfi í þágu þeirra sem aðstoðar þurfa vegna aðstæðna sinna og stuðla þannig að velferð einstaklinga og fjölskyldna.“

Fyrir slettu ári birti akureyri.net bráðskemmtilegt viðtal Rakelar Hinriksdóttur við Vilhjálm Bergmann Bragason í þremur hlutum, og ástæða er til að vekja athygli á því í ljósi þess að hann er bæjarlistamaður þetta ár.

• 1. hluti – „Ég er gömul sál og nörd í grunninn“
• 2. hluti – „Fékk fyrsta hlutverk níu ára gamall hjá LA“
• 3. hluti – „Ég er eiginlega ófær um að grínast ekki“