Veðurblíða í Eyjafirðinum

Veðrið lék við Akureyringa í dag og orðatiltækið að skjótt skipist veður í lofti á sannarlega við í höfuðstað Norðurlands nú. Fyrir fáeinum dögum snjóaði á kjósendur og frambjóðendur en nú sleiktu þeir allir sólina þótt sennilega séu ekki allir í sólsskinsskapi að kosningum loknum.

Um miðjan dag var hátt í 20 stiga hiti, sólskin og logn. Mælirinn á Ráðhústorgi – stundum kallaður Lygamælirinn – sýndi mest 19 gráður og enginn rengir líklega hans mat að þessu sinni.

Þýska skemmti­ferðaskipið MS Deutsch­land lá við Oddeyrarbryggju í dag og farþegar spókuðu sig í bænum. Skipið tek­ur rúm­lega 500 farþega. Bent var á það í Morgunblaðinu á dögunum að aðdá­end­ur þýskra sápuópera gætu kann­ast við skipið en sjón­varps­serí­an Das Traumschiff, eða Drauma­skipið, var lengi vel tek­in upp um borð í því.