Ungt fólk leiðir samtal kynslóða 10. október
Samtal, félag til almannaheilla, stendur fyrir samtalsverkefni laugardaginn 10. október þar sem ungu fólki býðst að leiða samtal kynslóða, hlusta á ólík sjónarmið og ræða hvað hvert okkar og eitt getur lagt af mörkum við mótun framtíðarinnar. Verndari verkefnisins er frú Halla Tómasdóttir, forseti Íslands.
Hugmyndin er að samtölin geti farið fram um allt land og getur fólk á aldrinum 16-30 ára boðið sig fram sem „lóðsa“ og fengið þjálfun til að leiða samtölin, að því er fram kemur í tilkynningu Samtals, sem hvetur fólk úr öllum stéttum, á öllum aldri og um allt land til að setjast niður með unga fólkinu. Upplýsingar um þátttöku og skráning fyrir þátttakendur og „lóðsa“ eru á vefnum talasaman.is.
„Nú í október viljum við því ekki aðeins minnast þess sem gerðist í Reykjavík fyrir fjórum áratugum. Við viljum líka minna okkur og aðra á gildi samtalsins. Markmiðið er ekki að við verðum sammála um allt, heldur að við lærum hvert af öðru. Og að við leitum að því sem sameinar okkur án þess að óttast það sem okkur greinir á um.
Við sem eldri erum berum sannarlega ríka ábyrgð á þeim forsendum sem framtíð þeirra yngri byggist á. Þess vegna er Samtal ekki aðeins samtal milli ungs fólks. Það er samtal kynslóða um framtíðina. Hugmyndin er að foreldrar, afar og ömmur, kennarar, atvinnurekendur, stjórnmálamenn, listafólk og almenningur um allt land setjist niður með unga fólkinu til að rækta traust og tengsl okkar hvert við annað og til að gefa þeim sem eru að vaxa úr grasi tækifæri til hafa áhrif á eigin framtíð.“
Um verkefnið segir meðal annars í tilkynningu: „Samtalið fer fram í tengslum við 40 ára afmæli leiðtogafundarins í Höfða. Árið 1986 settust leiðtogar Bandaríkjanna og Sovétríkjanna, Ronald Reagan og Mikhail Gorbatsjov niður í Reykjavík til samtals, meðal annars til að ræða ágreining og vopnakapphlaup ríkjanna tveggja. Fundinum lauk án niðurstöðu en samtal þeirra varð mikilvægur áfangi á leið til samnings um fækkun kjarnorkuvopna.“