Fara í efni
Fréttir

Þórsarar taka á móti ÍBV í dag - frítt inn

Sigurður Marinó Kristjánsson og Ólafur Aron Pétursson búa sig undir að taka aukaspyrnu þegar ÍBV hei…
Sigurður Marinó Kristjánsson og Ólafur Aron Pétursson búa sig undir að taka aukaspyrnu þegar ÍBV heimsótti Þór í fyrrasumar. Jóhann Helgi Hannesson lengst til hægri. Ljósmynd: Skapti Hallgrímsson.

Þór og ÍBV mætast í Lengjudeildinni í knattspyrnu, næst efstu deild Íslandsmótsins, í dag klukkan 17.30 á Þórsvellinum (SaltPay vellinum). Liðin áttu að mætast fyrr í mánuðinum en leiknum þá frestað eftir að Covid smit kom upp í leikmannahópi ÍBV og mannskapurinn fór ýmist í einangrun eða sóttkví.

Vert er að vekja athygli á því að frítt er á leikinn, en áfram er skráningarskylda áhorfenda af sóttvarnaástæðum.

Þeir sem geta eru beðnir að sækja sér frímiða í appið Stubb og skrá sig. Einnig verður hægt að gera það við innganginn en er tímafrekara.

ÍBV er í 2. sæti deildarinnar með 35 stig eftir 16 leiki og í baráttu við Kórdrengi um að fylgja Fram upp í efstu deild. Þórsarar eru í 10. sæti með 20 stig úr 18 leikjum. Þórsliðið hefur átt í vandræðum með að skora undanfarið; hefur ekki tekist það í síðustu fimm leikjum. Vonandi verður breyting þar á í dag, liðið lék vel í fyrri hálfleik gegn Fjölni á laugardaginn og fékk góð færi til að skora.

ÍBV vann fyrri leik liðanna í sumar, 2:1. Jóhann Helgi Hannesson skoraði fyrir Þór og staðan var 1:1 þar til í uppbótartíma er heimamenn gerðu sigurmarkið. Viðureign liðanna á Þórsvellinum síðasta sumar lauk með jafntefli, 1:1.