Fréttir
Sól um hádegisbil
24.08.2025 kl. 06:00
EYRARPÚKINN - 53
Stundum signi ég mig á tröppunum að ráði mömmu.
Oftar kipra ég þó sjónir gegn sólu um hádegisbilið og breytist þá hvíta hennar í sindrandi eggjarauðu undir heitum augnalokum.
Þegar sól er í hásuðri er klukkan tólf þó við séum sjaldan sammála um það bræður.
Það er gott að láta líða úr sér á tröppunum í skjóli gegn norðangarra og auðvitað skyggnir maður Súlur og Vaðlaheiði.
Og kannski ekki úr vegi þegar mamma kemur vappandi að fara með
Nú er ég klæddur og kominn á ról
Kristur Jesús veri mér skjól.
Í Guðsóttanum gefðu mér
að ganga í dag svo líki þér.
Jóhann Árelíuz er rithöfundur og skáld.
- Sól um hádegisbil er kafli úr Eyrarpúkanum, gáskafullu skáldverki sem gerist á Eyrinni á Akureyri um miðja síðustu öld. Bókin kom út 2003.
