Snjó kyngir niður seinni hluta vikunnar
Allt útlit er fyrir norðanátt á Akureyri og annars staðar á Norðurlandi næstu daga og líklega fram yfir næstu helgi. Þrátt fyrir vindáttina verður þó ekki mjög kalt, að sögn Einars Sveinbjörnssonar, veðurfræðings hjá blika.is.
Úrkoma verður einkum utantil í Eyjafirði næstu daga og til dæmis er spáð 100 millimetra úrkomu í Ólafsfirði fram á miðvikudag, reyndar slyddu og að bleytusnjór verði í bænum. Hins vegar verður lítil úrkoma innan til í Eyjafirði í dag og á morgun en það breytist seint á miðvikudag. Frá fimmtudegi til laugardags eða jafnvel sunnudags eru horfur á að snjó kyngi niður á Akureyri, sagði Einar eftir að hafa rýnt í tiltæk gögn fyrir Akureyri.net, en hiti verður rétt við frostmark og vindur tiltölulega hægur.
Spáin ætti því að teljast viðunandi fyrir bílstjóra og gangandi en mjög góð fyrir skíðamenn.