Sandra og Baldvin íþróttafólk Akureyrar

Sandra María Jessen knattspyrnukona hjá 1. FC Köln í Þýskalandi og Baldvin Þór Magnússon hlaupari úr Ungmennafélagi Akureyrar voru kjörin íþróttakona og íþróttakarl Akureyrar árið 2025, eins og akureyri.net greindi fyrr í kvöld. Hér er að finna ítarlegri upplýsingar um kjörið.

Þetta er þriðja árið í röð sem Sandra María er kjörin besta íþróttakona bæjarins og Baldvin Þór hlotnaðist nafnið í annað skipti, hann var einnig kjörinn árið 2023.

Niðurstaða árlegs kjörs var kunngjörð á íþróttahátíð sem Íþróttabandalag Akureyrar og Akureyrarbær stóðu fyrir í menningarhúsinu Hofi síðdegis í dag.

Af 20 aðildarfélögum ÍBA tilnefndu 13 þeirra alls 46 íþróttamenn úr sínum röðum, 20 íþróttakonur og 26 íþróttakarla. Úr þeim tilnefningum var svo kosið á milli tíu karla og tíu kvenna sem stjórn Afrekssjóðs hafði stillt upp.

• Í öðru sæti voru þau Hallgrímur Mar Steingrímsson knattspyrnumaður hjá KA og Julia Bonet Carreras blakkona í KA.
• Í þriðja sæti urðu Alex Cambray Orrason kraftlyftingamaður úr KA og Hafdís Sigurðardóttir hjólreiðakona úr HFA.
• Í fjórða sæti voru Unnar Hafberg Rúnarsson íshokkímaður úr SA og Stefanía Daney Guðmundsdóttir frjálsíþróttakona hjá UFA.
• Í fimmta sæti urðu Bjarni Ófeigur Valdimarsson handboltamaður hjá KA og Andrea Ýr Ásmundsdóttir kylfingur hjá GA.

BALDVIN ÞÓR MAGNÚSSON 

Í umsögn ÍBA um íþróttakarl ársins á Akureyri sagði:

• Baldvin Þór Magnússon er íþróttakarl Akureyrar í annað sinn. Baldvin Þór er fæddur á Akureyri en flutti ungur til Bretlands með foreldrum sínum.
• Hann fór á íþróttastyrk til Bandaríkjanna í háskólanám og æfði þar og keppti í fimm ár. Hann hefur nú snúið aftur til Bretlands og æfir þar með sterkum hópi hlaupara. Baldvin heldur góðum tengslum við heimalandið og kemur reglulega heim og tekur þátt í mótum, nú síðast á RIG síðastliðna helgi.
• Baldvin er einn allra sterkasti millivegalengda- og langhlaupari sem Ísland hefur átt. Hann hefur náð framúrskarandi árangri á undanförnum árum í hlaupum frá 1500 m og upp í 10 km hlaup.
• Hann á sem stendur sautján virk Íslandsmet, sex í yngri aldursflokkum og ellefu í flokki fullorðinna.
• Helsta íþróttaafrek hans á árinu 2025 voru:
• Íslandsmet í 1500 m innanhúss – 3:39,67 mín.
• Íslandsmet í 3000 m innanhúss – 7:39,94 mín.
• Íslandsmet í 10 km götuhlaupi – 28:37 mín.
• Norðurlandameistari í 3000 m innanhúss
• Íslandsmeistari í 1500 m utanhúss
• Sigur og brautarmet í 10 km í Reykjavíkurmaraþoni

SANDRA MARÍA JESSEN

Í umsögn ÍBA um íþróttakonu ársins á Akureyri sagði meðal annars:

• Sandra María Jessen er íþróttakona Akureyrar í þriðja sinn. Sandra María var lykilleikmaður í liði Þórs/KA í Bestu deildinni í sumar, fyrirliði liðsins og leiddi liðið í markaskorun.
• Hún sýndi ítrekað hve mikilvæg hún var liði sínu og í raun ein besta knattspyrnukona sem spilaði í Bestu deildinni á árinu.
• Sandra María spilaði samtals 21 leik fyrir Þór/KA í Íslandsmóti, bikarkeppni og deildarbikar árið 2025 og skoraði 17 mörk. Þar af voru 14 leikir og 10 mörk í Bestu deildinni.
• Sandra María spilaði 12 landsleiki á árinu, þar af var hún í byrjunarliðinu í átta leikjum.
• Hún náði þeim áfanga á árinu að spila sinn 50. landsleik fyrir Íslands hönd og var ein af bestu leikmönnum íslenska landsliðsins á lokamóti EM í sumar.
• Frammistaðan á EM vakti athygli og varð Sandra eftirsótt af erlendum liðum í kjölfarið. Í lok ágúst hafði Sandra vistaskipti til þýska úrvalsdeildarfélagsins 1. FC Köln þar sem hún hefur farið á kostum.
• Sandra er lang markahæst í liði 1. FC Köln og meðal markahæstu kvenna í þýsku úrvalsdeildinni það sem af er yfirstandandi keppnistímabili.