Púlsinn - íslenskur samfélagsmiðill

Akureyringurinn Andri Már Þórhallsson og félagar hans hjá Púls Media hafa sett á laggirnar nýjan íslenskan samfélagsmiðil Púlsinn með það að markmiði að skapa vettvang fyrir skoðanaskipti og samfélagsumræðu undir nafni. Að sögn Andra hefur tilkoma gervigreindarefnis og vaxandi áhrif algóritma hjá stóru erlendu samfélagsmiðlunum gert það að verkum að þeir miðlar hafa svolítið týnt uppruna sínum. Sem er að tengja fólk saman. En það á Púlsinn hins vegar að gera.

Púlsinn er smáforrit sem lengi hefur verið til og auðveldar notendum að skoða fréttir á einum stað frá þeim fréttamiðlum sem það kýs. Með þessari nýju viðbótarvirkni geta notendur stofnað aðgang, tjáð sig um málefni líðandi stundar, deilt fréttum, fylgt öðrum notendum, sett inn athugasemdir og líkað/mislíkað við innlegg annarra notenda. Einnig er hægt að fylgjast með íslenskum hlaðvörpum og ýmislegt fleira. Allt undir eigin nafni, enda er farið fram á auðkenningu með rafrænum skilríkjum þegar aðgangur er stofnaður, og aldurstakmarkið er 18 ár.

Andri segir í spjalli við akureyri.net að hann hafi verið kominn með nóg af því að fá bara upp á Facebook einhverjar dánarfregnir og pósta úr hinum og þessum grúppum sem hann sé ekki einu sinni meðlimur í. „Maður hefur svo litla stjórn á algóritmanum, á því sem maður sér. Og ef þetta er vandamál hjá mér þá hlýtur þetta að vera vandamál hjá fleirum og það kom mér raunverulega á óvart hvað fólk virðist þola Facebook illa, miðað við hvað notkunin er ennþá töluvert mikil. Maður er löngu hættur að sjá eitthvað frá vinum sínum þarna inni. En maður heldur áfram að fara þarna inn og sér ekkert nema auglýsingar og gervigreindarframleitt drasl,“ segir Andri.

Afturhvarf til fortíðar - tengja fólk saman

„Þannig að ég held að það hljóti að vera að það sé hægt að búa til vettvang þar sem fólk er raunverulega að setja eitthvað inn sem er áhugavert eða fyndið eða tengist á einhvern hátt okkar sameiginlega raunveruleika. Ég held að það sé vandamál hjá þessum stóru miðlum að þeir eru búnir að fókusera svo mikið á að virkja einhverjar dópamínstöðvar í heilanum til að halda okkur skrunandi endalaust að þeir eru búnir að gleyma því af hverju þeir bjuggu þetta til í upphafi, sem er að tengja fólk saman. Þannig að þetta er pínu afturhvarf til fortíðar að einhverju leyti; löngunin til að búa til þennan miðil, vegna þess að það var á sínum tíma raunverulega verið að tengja fólk saman á þessum miðlum, áður en þeir urðu svona brjálæðislega AI-generataðir og algóritmamiðaðir,“ segir Andri. „Við vorum orðnir leiðir á öllu þessu rugli sem er búið til af gervigreind og er eingöngu hannað til þess að fanga athygli fólks en hefur enga gagnsemi,“ ítrekar hann og bætir við að á Púlsinum sé hægt að fallbeygja nöfn til að tagga – nokkuð sem stóru, erlendu miðlarnir hafa ekki ennþá getað boðið upp á.

Á Púlsinum eru bara auðkenndir notendur og enginn vélrænn algóritmi sem stýrir því hvað birtist og „ekkert gervigreindarframleitt sorp gert í þeim eina tilgangi að fanga athygli,“ segir Andri. Notendur velja og stjórna því sjálfir hvað þeir sjá. Andri segir að notendur þurfi að samþykkja samskiptareglur miðilsins og ekki sé hægt að komast upp með hvað sem er. „Og ef þú ferð ekki eftir þessum reglum þá er bara hægt að hafa þig úti. En það er samt flókin lína að þræða því það verður auðvitað umdeilt líka ef maður fer að ritskoða. En það er svosem nokkuð augljóst hvað er bannað og hvað ekki. Þú mátt alveg hafa skoðanir þarna en kannski ekki vera með hatursáróður og svoleiðis,“ segir Andri. 

Ein undantekning frá reglunni um nafnleynd

Auk þess að geta t.d. fylgst með hlaðvörpum, og deilt áhugaverðum bútum úr þeim til annarra notenda, eru ýmsir fleiri afþreyingarmöguleikar í boði. „Og svo erum við með margt fleira skemmtilegt þarna inni eins og það sem við köllum Tónleikur. Það er eins konar tónlistargetraun þar sem þú þarft að giska á hvaða lag er að spilast, á sem stystum tíma. Fyrsta „kvissið“ sem varð vinsælt var Bubbi Morthens, hann var náttúrlega með stóra tónleika um daginn, og þarna er fólk að ná alveg ótrúlegum árangri og nær að þekkja lögin nánast á sömu sekúndunni og það heyrist,“ segir Andri og sagðist hafa átt bágt með að trúa hvað margir voru vel að sér í meistaranum. „Ég hefði ekki trúað þessu, ég þarf að búa til annað sem er Bubbi fyrir lengra komna,“ segir Andri og hlær.

Andri er þeirrar skoðunar að samskipti undir nafni verði jávæðari og uppbyggilegri án gerviaðganga og dulnefna. „Þannig að þetta er gert að einhverju leyti líka til að hafa gaman og tengjast og skiptast á skoðunum, helst allt sem jákvæðastan og uppbyggilegastan máta ásamt því að vera fræðandi og bæta einhverju við. Að einstaklingarnir sem eru að tjá sig þarna hafi eitthvert erindi, að það sé ekki bara skítkast,“ segir Andri og bendir á að ekki sé mögulegt að villa á sér heimildir með því að búa til gerviaðgang eða aðgang undir dulnefni. Allt sem notendur gera er undir nafni – með einni undantekningu. „Við bjóðum þér að líka eða mislíka við efni undir nafnleynd til þess að hinn svokallaði þögli meirihluti fái að tjá sig líka. Þannig að þeir sem þora ekki eða vilja ekki standa í því að hafa einhverjar skoðanir opinberlega geti líka sagt mér finnst þetta rétt skoðun eða röng skoðun – til þess að reyna að hafa þetta aðeins uppbyggilegri umræðu en klassísku kommentakerfin bjóða upp á,“ segir hann.

Meira en helmingur auglýsingafjár rennur til erlendra miðla

Síðan er annar flötur á Púlsinum sem Andri bendir á. Íslensk fyrirtæki eyða gríðarlegum fjármunum í auglýsingar á samfélagsmiðlum og drjúgur hluti þess fjár streymir úr landi. „Í grunninn erum við hjá Púls Media auglýsingafyrirtæki og við vildum geta nýtt okkar platform betur til þess að íslenskir auglýsendur myndu nota íslenska miðla. Okkur ofbýður hvað Facebook og þessir erlendu miðlar eru að taka mikið af auglýsingatekjum. Núna nýlega fór það í meirihluta, 51% af auglýsingamarkaðsfjármagni íslenskra fyrirtækja fer erlendis. Þetta er svona partur af því markmiði að halda þessu markaðsfé heima,“ segir Andri. „Þessar Facebook-auglýsingar eru ekkert skattaðar, enginn virðisaukaskattur og ekki tekjuskattur af gróðanum og þetta skapar engin störf hérna á Íslandi þannig að við ákváðum bara að það væri raunhæft að reyna að búa til sambærilegan miðil þannig að bæði við Íslendingar gætum notað íslenskan miðil og auglýsendur gætu náð til Íslendinga gegnum íslenskan miðil líka,“ segir Andri.

Andri segir viðtökurnar við Púlsinum góðar og auðkenndir notendur eru orðnir vel á annað þúsund á fyrstu vikunum eftir að  samfélagsmiðlavirknin bættist við smáforritið. Þar að auki skipta þau þúsundum sem hafa sótt forritið en ekki auðkennt sig sem notendur ennþá. „Það verður bara virkilega spennandi að sjá hvernig tekst til að þróa þetta. Þetta er fyrir fullorðið fólk, við erum ekki að höfða til yngra fólks. Þetta er miklu sambærilegra við Twitter, Reddit eða Facebook og við erum mjög sterk í eldri aldurhópnum, líkara Facebook að einhverju leyti. Eldra fólk fílar að nota þetta, oft í Ipad til að lesa fréttir og þá er umræðan bara bónus ofan á það, að geta fylgst með hvað fólk hefur að segja,“ segir Andri.