Opið fyrir skíðamenn í Hlíðarfjalli til 17.00

Skíðasvæðið í Hlíðarfjalli var opnað í gær, í fyrsta skipti í vetur, og verður opið um helgina, með nokkrum takmörkunum vegna sóttvarnarreglna.

Í dag og á morgun er skíðasvæðið opið frá klukkan 10.00 til 17.00 en til þess að sem flestir geti notið er skíðadeginum skipt í tvennt.

Báða dagana er opið 10.00 – 13.00, þá verður lyftum lokað í klukkustund þannig að þeir sem hverfa þá á braut, og hinir sem koma í fjallið, verði þar ekki samtímis. Síðan verða lyftur í gangi á ný kl. 14.00 – 17.00.

Þeir sem nú þegar hafa keypt sér vetrarkort komast í fjallið hvenær sem er um helgina og er gert ráð fyrir þeim í heildarfjölda sem leyfilegur er í fjallið hverju sinni.

Samkvæmt upplýsingum úr Hlíðarfjalli er mikilvægt er að allir kaupi sér miða á heimasíðu svæðisins, www.hlidarfjall.is áður en komið er. Allir þurfa að eiga Skidata vasakort sem skráð verður í söluferlinu. Ef fólk vantar þannig kort eru þau til sölu á N1 stöðvum á Akureyri og völdum N1 stöðvum í Reykjavík.

Svo minna forráðamenn skíðasvæðisins á þær reglur sem eru í gildi:

• Grímuskylda er í og við skíðahótel, salerni og lyftur
• Tveggja metra regla skal viðhöfð á svæðinu
• Minni flutningsgeta er í stólalyftu, þeir sem mæta saman á svæðið geta farið saman í stól en ef fólk kýs að fara eitt þá á það rétt á því.