Fara í efni
Fréttir

Norðurorka: 10 milljónir til samfélagsverkefna

Styrkþegar eða fulltrúar þeirra að lokinni úthlutun ásamt Eyþóri Björnssyni forstjóra Norðurorku. Ljósmynd: Auðunn Níelsson

Norðurorka afhenti í gær styrki til 58 samfélagsverkefna, alls 10 milljónir króna. Alls bárust 125 umsóknir, fleiri en nokkru sinni.

„Eftirtektarvert var hve fjölbreytni verkefnana er mikil sem lýsir vel þeirri grósku sem býr í samfélaginu okkar. Fjögurra manna vinnuhópur (skipaður starfsfólki NO) fór yfir umsóknirnar og varð niðurstaða hópsins að veita styrki til 58 verkefna. Verkefnið var erfitt enda fjölmörg góð verkefni sem sótt var um styrk til og ákveðin upphæð sem var til ráðstöfunar,“ segir í tilkynningu frá Norðurorku.

Afhending styrkjanna fór fram í Menningarhúsinu Hofi, „sem er vel við hæfi þar sem Norðurorka er bakhjarl Menningarfélagsins“ eins og það er orðað.

Í október 2022 auglýsti Norðurorka hf. eftir umsóknum um styrki til samfélagsverkefna fyrir árið 2023 og rann umsóknarfrestur út 15. nóvember. Fram kom að veittir væru styrkir til menningar- og lista, íþrótta- og æskulýðsstarfs og góðgerðarmála. Markmið með styrkjunum er að styðja við sjálfsprottið starf, starfsemi frjálsra félagasamtaka og framtak einstaklinga sem stuðlar að farsælli þróun samfélagsins, lífsgæðum og fjölbreyttu mannlífi.

„Í ár tengjast flest verkefnanna fræðslu og stuðningi annarsvegar og íþróttum og útivist hinsvegar, menning og listir eru þó einnig áberandi. Sem dæmi um fjölbreytileika verkefna sem hlutu styrk þá voru veittir styrkir til afreksíþróttafólks, móðurmálskennslu fyrir flóttafólk, heimildamyndagerðar, kaupa á hryggsjá, ritlistasamkeppni fyrir grunnskólabörn og ókeypis fyrirlestra fyrir eldri borgara,“ segir í tilkynningu Norðurorku.

„Mörg þessara verkefna eiga það sameiginlegt að á bak við þau liggur mikil sjálfboðavinna fólks sem leggur sig fram við að veita sínu hjartans máli eða áhugamáli brautargengi og því er það sérstaklega ánægjulegt að geta átt þátt í að verðlauna slíkt starf.“