Mótmæla staðsetningu smáhúsa í Síðuhverfi
Á sjötta tug athugasemda bárust frá íbúum við auglýsingu um breytt deiliskipulag í Síðuhverfi vegna fyrirhugaðrar byggingar smáhýsa fyrir fólk með fjölþættan geð- og fíkniefnavanda. Nær allar athugasemdirnar eru neikvæðar þar sem íbúar mótmæla þessari skipulagsbreytingu og staðsetningu smáhúsanna.
Akureyri.net hefur áður fjallað um áform um byggingu smáhúsanna og má í þeirri frétt sjá staðsetningum umrædds skipulagsreits.
Athguasemdirnar eru misítarlegar, en allar með nokkurn veginn sama stefinu. Bent er á nálægð svæðisins við rólegt, öruggt og barnmargt íbúahverfi, nálægð við Síðuskóla og almennt öryggi íbúanna, ekki síst barna í hverfinu.
Skipulagsráð samþykkti á fundi sínum í vikunni að leggja til við bæjarstjórn að tillaga að breytingu á deiliskipulagi verði samþykkt óbreytt frá auglýstri tillögu. Skipulagsfulltrúa var falið að útbúa drög að umsögn um innkomnar athugasemdir í samráði við starfsmenn velferðarsviðs.
Þá kemur fram í afgreiðslu skipulagsráðs að ráðið beinir því til skipulagsfulltrúa að gert verði ráð fyrir samskonar landnotkun í deiliskipulagi svæðis milli Kjarnagötu og Naustaborga. Miðað er við að vinna við deiliskipulag þess svæðis fari í gang á næstu mánuðum. Eins og áður hefur komið fram í umfjöllun akureyri.net er einnig unnið að undirbúningi vegna byggingu sams konar búsetuúrræða við Baldursnes og Hlíðarfjallsveg.
