Fréttir

Möl og sandur flytur að Sjafnarnesi

Skapti Hallgrímsson - skapti@akureyri.net 29.06.2026 kl. 14:00

Nýtt athafnasvæði Malar og sands er við Sjafnarnes, á iðnaðarsvæði nyrst í bænum. Steypustöðin er neðst fyrir miðri mynd. Mynd: Axel Þórhallsson

Möl og sandur hóf á laugardaginn starfsemi á nýju athafnasvæði fyrirtækisins við Sjafnarnes, í nyrsta hluta Akureyrar. Þá var gangsett ný steypustöð, mun afkastameiri en sú gamla. Fyrstu hrærur úr stöðinni voru notaðar til að steypa aðstöðu fyrir efnislager fyrirtækisins á svæðinu.

Steypustöðin við Sjafnarnes er frá þýskum framleiðanda, NISBAU, og hrærir 2,6 rúmmetra í einu en gamla stöðin 1,15 rúmmetra, að sögn Hjartar Narfasonar framkvæmdastjóra Malar og sands. Hann segir að næstu daga verði unnið við að stilla tölvubúnað og annað tilheyrandi. Gamla steypustöðin við Súluveg er enn í notkun en að sögn Hjartar er stefnt að því að steypuframleiðslan verði alfarið flutt í Sjafnarnes í síðasta lagi um miðjan júlí.

Hjörtur Narfason framkvæmdastjóri Malar og sands á nýju athafnasvæði fyrirtækisins á laugardaginn þegar nýja steypustöðin var notuð í fyrsta skipti. Mynd: Skapti Hallgrímsson

Steypustöðin við Súluveg hefur verið starfrækt þar í hálfan sjötta áratug. Hún var flutt til landsins árið 1967 í því skyni að steypa fyrsta áfanga álversins í Straumsvík í Hafnarfirði en Möl og sandur keypti stöðina að því loknu og flutti til Akureyrar þar sem hún gangsett 1971.

Auk nýju steypustöðvarinnar tekur Möl og sandur nú í notkun endurvinnslustöð fyrir blauta steypu, frá fyrirtækinu BIBKO í Bretlandi. „Í hana fer allt skol úr bílum og steypustöð. Endurvinnslustöðin skilur svo steina og sand frá og sementsvatnið sem situr eftir er svo notað aftur, það fer inn á hærivélina þegar næstu steypuafgreiðslur fara fram,“ segir Hjörtur Narfason við akureyri.net.

Samkvæmt samningi Malar og sands og Akureyrarbæjar skal fyrirtækið skila lóðinni við Súluveg í upprunalegu ástandi í síðasta lagi eftir fimm ár. Hugmyndir hafa verið uppi um að íbúðabyggð á svæðinu, meðfram Glerá.

Fyrsta steypan úr nýju stöðinni var notuð til að útbúa svæði fyrir efnislager fyrirtækisins við Sjafnarnes. Mynd: Skapti Hallgrímsson

Ánægðir með nýju steypustöðina. Frá vinstri: Hjalti Jónsson, Hjörtur Narfason og Garðar Már Sverrisson. Mynd: Axel Þórhallsson

Til baka í fréttayfirlit