Mikil hálka á götum og gangstéttum

Mikil hálka er nú á Akureyri, bæði á götum og gangstéttum. Aðstæður eru víða erfiðar og geta skapað hættu fyrir bæði gangandi vegfarendur og ökumenn. Varað er við aðstæðum á vef Akureyrarbæjar.

Starfsfólk bæjarins vinnur að því að hálkuverja og brjóta upp klaka þar sem þörf er á til að bæta aðstæður sem fyrst.

„Íbúar og aðrir vegfarendur eru beðnir um að fara varlega á meðan aðstæður eru með þessum hætti. Sérstaklega er bent á að aka með aðgát, halda góðri fjarlægð milli bifreiða og sýna aðgát á gangstéttum þar sem klaki getur leynst,“ segir á vef bæjarins.

Til að auðvelda íbúum að bregðast við hefur verið komið fyrir haugum af grófum sandi á völdum stöðum í bænum þar sem fólk getur sótt sér efni til hálkuvarna. Sand má nálgast á eftirfarandi stöðum, að því er segir á vef Akureyrarbæjar:

• Grenndarstöð norðan Ráðhússins
• Grenndarstöð við Bónus í Naustahverfi
• Grenndarstöð við Bónus við Langholt
• Grenndarstöð við Hagkaup
• Grenndarstöð við Merkigil
• Grenndarstöð við Hrísalund
• Grenndarstöð við Byggðaveg