Fara í efni
Fréttir

„Mesti sársauki sem ég hef fundið“

Ívar Örn á flugi í gær, sekúndubrotum áður en hann lenti harkalega á stöng Blikamarksins. Ljósmyndir…
Ívar Örn á flugi í gær, sekúndubrotum áður en hann lenti harkalega á stöng Blikamarksins. Ljósmyndir: Skapti Hallgrímsson

Betur fór en á horfðist þegar Ívar Örn Árnason, varnarmaðurinn öflugi í KA, rakst harkalega á markstöng í leiknum gegn Breiðabliki á Íslandsmótinu í knattspyrnu í gær. Hann var greinilega sárþjáður, leikurinn var stöðvaður í nokkrar mínútur á meðan hlúð var að Ívari en jaxlinn hélt síðan áfram leik eins og ekkert hefði í skorist.

Rúmlega 70 mínútur voru liðnar þegar Þorri Mar Þórisson sendi boltann fyrir markið, Anton Ari Einarsson markvörður Breiðabliks greip hann nokkuð þægilega en Ívar, sem ætlaði að trufla Anton Ara, skall á stönginni. „Ég ætlaði að fara í markmanninn svo þeir fengju aukaspyrnu, þá hefðum við tíma til að stilla upp í vörn en Viktor Örn [Margeirsson] ýtti aðeins í bakið á mér, ekki fast en nóg til þess að ég missti jafnvægið,“ sagði Ívar Örn við Akureyri.net í dag.

„Ég náði að setja hendurnar á stöngina og koma í veg fyrir að ég lenti með andlitið á henni en mesta höggið var á spöngina; svæðið á milli pungs og rass! Það var ekki gott; ég fékk rosalegan verk í grindarbotninn – þetta er mesti sársauki sem ég hef fundið á ævinni.“

Hann harkaði af sér sem fyrr segir og lauk leiknum. Var aumur í gærkvöldi „en ég hefði sennilega verið miklu verri ef við hefðum ekki unnið leikinn!" segr Ívar í léttum dúr.

Hann æfði létt í dag og verður klár í leikinn gegn Val um næstu helgi. „Ég er ekki verri en það að ég fór og spilaði golf í dag. Þetta hrjáir mig ekki neitt." 

Smellið hér til að sjá umfjöllun um leikinn og myndir