Fréttir
Löngum hlýindakafla fer senn að ljúka
22.07.2021 kl. 06:00
„Löngum og vænum hlýindakafla fyrir norðan og austan fer senn að ljúka,“ skrifaði Einar Sveinbjörnsson, veðurfræðingur hjá Bliku og veðurvinur Akureyri.net, á Facebook síðu sína í gærkvöldi. Hann segir spáð háloftalægð um helgina, með svalara lofti og bleytu.
Svo má eiga von á norðaustan átt á næstunni. Einar segir: „Um verslunarmannahelgina, í það minnsta framan af henni, eru metnar um 50-60% líkur á NA-átt með hringsóli lægðar við Færeyjar. Slíka klassíska NA-átt höfum við varla séð hér frá því um 10.-15. júní. Eins og hún getur nú verið algeng á sumrin – en af flestum fremur illa þokkuð.“