Ljósaganga – Gengið gegn ofbeldi í dag

Ljósaganga gegn ofbeldi verður gengin frá Ráðhústorgi að Amtsbókasafninu í dag. Lagt verður upp frá Ráðhústorginu kl. 16:30. Á Amtsbókasafninu flytur Tryggvi Hallgrímsson, sérfræðingur á Jafnréttisstofu, stutt erindi.

 

Ljósagangan er gengin í tilefni 16 daga átaks gegn kynbundnu ofbeldi – #16 dagar. Alþjóðlegt 16 daga átak gegn kynbundnu ofbeldi má rekja aftur til ársins 1991. Í tilkynningu um viðburðinn á Facebook segir að tímabil átaksins tengi á táknrænan hátt saman dagana 25. nóvember sem er alþjóðlegur baráttudagur gegn ofbeldi gegn konum og 10. desember sem er alþjóðlegi mannréttindadagurinn. Markmið átaksins er að knýja á um afnám alls ofbeldis og í ár er sjónum beint að stafrænu ofbeldi gegn konum og stúlkum.