Fréttir
Kona lést á Akureyri í nótt – einn handtekinn
22.04.2024 kl. 12:25
Grunur leikur á að andlát konu í íbúð fjölbýlishúss á Akureyri síðastliðna nótt hafi borið að með saknæmum hætti. Rannsókn lögreglu er á frumstigi.
Lögreglumönnum sem komu á vettvang var vísað á meðvitundarlausa konu, endurlífgunartilraunir hófust þegar í stað en báru ekki árangur og konan var úrskurðuð látin á staðnum.
Tilkynning sem birt var á Facebook síðu Lögreglunnar á Norðurlandi eystra í hádeginu er svohljóðandi:
„Klukkan 04:30 aðfaranótt mánudags var lögreglan á Norðurlandi eystra kölluð að fjölbýlishúsi á Akureyri.
Fyrstu lögreglumönnum sem komu á vettvang var vísað á meðvitundarlausa konu í íbúðinni og hófust endurlífgunartilraunir þegar í stað. Læknir og sjúkraflutningamenn komu einnig á vettvang en tilraunir til endurlífgunar báru ekki árangur og var konan úrskurðuð látin á vettvangi.
Grunur er um að andlátið hafi borið að með saknæmum hætti og hefur lögreglan hafið rannsókn. Í íbúðinni var annar einstaklingur og var hann handtekinn í þágu rannsóknar málsins og nýtur réttarstöðu sakbornings. Krafa um gæsluvarðhald yfir honum verður lögð fram fyrir dómi í dag. Rannsókn málsins er í höndum lögreglunnar á Norðurlandi eystra, sem nýtur aðstoðar tæknideildar lögreglunnar á höfuðborgarsvæðinu.
Rannsókn málsins er á frumstigi og mikil vinna framundan. Vegna rannsóknarhagsmuna er ekki hægt að veita frekari upplýsingar að svo stöddu.“