KAON fær 600 krónur af hverri MA-pitsu

Samfélagsverkefni undir yfirskriftinni Sneið fyrir samfélagið er hrundið af stað í dag. Þar taka höndum saman veitingastaðurinn Spretturinn í Kaupangi, Huginn - skólafélag Menntaskólans á Akureyri, og Krabbameinsfélag Akureyrar og nágrennis (KAON). 

• Verkefnið felst í því að nemendur MA hafa hannað þrjár pitsur sem seldar verða á Sprettinum og 600 krónur af hverri seldri pitsu renna til Krabbameinsfélagsfélags Akureyrar og nágrennis.

„Upphaflega var markmiðið að þróa pizzur sem höfða til ungs fólks. Fulltrúar MA komu að þróuninni frá grunni og niðurstaðan varð nýr pönnupizzubotn og þrjár spennandi pizzur sem nú eru komnar á matseðil,“ segir í tilkynningu um verkefnið. Þar kemur fram að seinna í ferlinu hafi kviknað sú hugmynd að láta verkefnið einnig leiða til góðs – og varð það grunnurinn að „Sneið fyrir samfélagið“.

Umræddar þrjár pítsur bera nöfnin Businn, Kvos-inn og Skólameistarinn „og endurspegla bæði sköpunargleði nemenda og tengingu við skóla- og bæjarlíf,“ segir í tilkynningunni.

„Við vildum skapa eitthvað sem tengir saman nemendur og samfélagið á einfaldan og skemmtilegan hátt. Hugmyndin er sú að hver pizza gefi til baka – ein sneið í einu,“ segir Aron Þór Sigurgeirsson, rekstrarstjóri Sprettsins.

„Það er mikilvægt fyrir okkur að taka þátt í verkefnum sem byggja á samstöðu og þátttöku. Hér fá nemendur tækifæri til að skapa eitthvað sem hefur raunveruleg áhrif,“ segir Tinna Kristinsdóttir, fyrir hönd Skólafélagsins Hugins.

Verkefnið Sneið fyrir samfélagið hefst í dag, 18. mars, og stendur allt til 15. apríl, „og verða reglulega birtar upplýsingar um framvindu verkefnisins,“ segir í tilkynningunni.