Kaflaskipt hjá KA/Þór gegn Haukum
KA/Þór tók á móti Haukum í efstu deild kvenna í handknattleik í gærkvöld. Eftir jafnan fyrri hálfleik hrökk allt í baklás hjá KA/Þór í upphafi þess seinni og Haukar unnu stórsigur, 31:20.
Leikurinn var mikilvægur fyrir heimaliðið, sem hefði með sigri átt góðar vonir um að geta þokað sér upp töfluna og nælt sér í heimaleikjarétt í úrslitakeppninni. Þær vonir dvínuðu mikið við þetta tap en Haukar halda sínu striki í 3. sætinu.
Fyrri hálfleikur var tiltölulega jafn, KA/Þór var yfir til að byrja með en í stöðunni 3:2 KA/Þór í hag skoruðu Haukar 6 mörk í röð og sneru leiknum sér í vil. Heimastúlkur náðu þó að saxa aðeins á forskot gestanna og í leikhléi munaði tveimur mörkum, 15:13 Haukum í vil.
Tíu Haukamörk gegn einu
KA/Þór minnkaði muninn í 15:14 í upphafi seinni hálfleiks en þá tók við tíu mínútna kafli þar sem liðið náði aðeins að skora eitt mark á meðan Haukar skoruðu tíu. Staðan orðin 25:15 og úrslitin ráðin. Þessi munur hélst nokkurn veginn óbreyttur til leiksloka og lokatölur 31:20 gestunum í vil.
Næstu leikir liðanna í deildinni verða ekki fyrr en 14. mars en bæði KA/Þór og Haukar taka þátt í bikarúrslitahelginni sem hefst með undanúrslitaleikjum næstkomandi miðvikudag.
Mörk KA/Þórs: Susanne Denise Pettersen 5, Trude Blestrud Hakonsen 4, Lydía Gunnþórsdóttir 4 (4 víti), Sólveig Lára Kristjánsdóttir 3, Anna Þyrí Halldórsdóttir 2, Bergrós Ásta Guðmundsdóttir 1, Tinna Valgerður Gísladóttir 1.
Varin skot: Bernadett Leiner 7, Ástrós Anna Bender 2 (1 víti).
Mörk Hauka: Jóhanna Margrét Sigurðardóttir 9 (3 víti), Rakel Oddný Guðmundsdóttir 5, Inga Dís Jóhannsdóttir 5, Sonja Lind Sigsteinsdóttir 3, Alexandra Líf Arnarsdóttir 3, Sara Marie Odden 3, Aníta Eik Jónsdóttir 1, Birta Lind Jóhannsdóttir 1, Embla Steindórsdóttir 1.
Varin skot: Sara Sif Helgadóttir 8, Erla Rut Viktorsdóttir 1.
