Jóna Margrét í KA á ný eftir tvö ár á Spáni

Jóna Margrét Arnarsdóttir, landsliðskona í blaki, er gengin til liðs við KA á ný eftir að hafa leikið í tvö ár með liði Sant Joan d'Alacant í næst efstu deild á Spáni.

„Jóna sem verður 22 ára seinna á árinu er uppalin hjá KA og er gríðarlega öflugur uppspilari,“ segir á heimasíðu KA þar sem tíðindin voru tilkynnt í dag. „Þrátt fyrir ungan aldur býr hún yfir mikilli reynslu en hún steig sín fyrstu skref í meistaraflokki KA aðeins 12 ára gömul. Hún vann sig fljótt inn í stærra og stærra hlutverk í liðinu og tók svo við sem aðaluppspilari KA liðsins í upphafi ársins 2020 er hún var enn aðeins 16 ára gömul.“

Jóna varð deildar-, bikar- og Íslandsmeistari með KA 2022 og 2023 og fór eftir það til kjölfarið til spænska liðsins þar sem hún hefur verið í lykilhlutverki sem aðaluppspilari liðsins, að því er segir á vef KA. 

„Þá hefur Jóna verið fastamaður í íslenska landsliðinu undanfarin ár og þar áður í öllum yngrilandsliðum Íslands. Í sumar lék hún á Smáþjóðaleikunum sem haldnir voru í Andorra fyrir Íslands hönd í strandblaki ásamt Thelmu Dögg Grétarsdóttur.“

Sjá nánar á vef KA: Jóna Margrét snýr aftur heim