Fara í efni
Fréttir

Ingibjörg verður efst hjá Framsókn

Ingibjörg Ólöf Isaksen, til vinstri, og Líneik Anna Sævarsdóttir.

Ingibjörg Ólöf Isaksen, bæjarfulltrúi á Akureyri, hafði betur í baráttu við Líneik Önnu Sævarsdóttur, alþingismann, um oddvitasæti á lista Framsóknarflokksins í Norðausturkjördæmi fyrir þingkosningarnar í haust. Ingibjörg skipar því 1. sæti listans, Líneik Anna verður í 2. sæti og Þórarinn Ingi Pétursson verður í 3. sæti.

Póstkosning stóð yfir allan marsmánuð en atkvæði voru talin í dag. Niðurstaða prófkjörs var tilkynnt í kvöld.

Líneik Anna er annar tveggja þingmanna framsóknarmanna fyrir Norðausturkjördæmi. Þórunn Egilsdóttir var oddviti flokksins í kjördæminu, en dró sig í hlé vegna veikinda fyrr í vetur.

Á kjörskrá voru 2.207 og niðurstaðan varð sem hér segir:

1. sæti, Ingibjörg Ólöf Isaksen, framkvæmdastjóri Læknastofa Akureyrar. Hún fékk 612 atkvæði í 1. sæti

2. sæti, Líneik Anna Sævarsdóttir, alþingismaður Fáskrúðsfirði. Hún fékk 529 atkvæði í 1.-2. sæti

3. sæti, Þórarinn Ingi Pétursson, bóndi Grýtubakkahreppi. Hann fékk 741 atkvæði í 1.-3. sæti.

4. sæti, Helgi Héðinsson, oddviti Skútustaðahrepps. Hann fékk 578 atkvæði í 1.-4. sæti.

5. sæti, Halldóra Hauksdóttir, lögmaður Akureyri. Hún fékk 547 atkvæði í 1.-5. sæti.

6. sæti, Kristinn Rúnar Tryggvason, bóndi Kelduhverfi. Hann fékk 496 atkvæði í 1.-6. sæti.

Aðrir sem tóku þátt í póstkosningunni voru:

Jón Björn Hákonarson, bæjarstjóri Fjarðabyggðar, Karítas Ríkharðsdóttir, blaðamaður Raufarhöfn, og Jónína Brynjólfsdóttir, viðskiptalögfræðingur Egilsstöðum.

Athygli vekur að Jón Björn, sem er ritari Framsóknarflokksins og situr þar með í framkvæmdastjórn hans, hlýtur ekki brautargengi. Hann sóttist eftir 2. sæti á listanum.