Fara í efni
Fréttir

Hús Matthíasar leigt, frestur til morguns

Sigurhæðir, hús séra Matthíasar; fallegt timburhús steinsnar neðan við Akureyrarkirkju. Ljósmynd: Skapti Hallgrímsson.

Sigurhæðir, hús séra Matthíasar Jochumssonar, hefur verið auglýst til leigu og hafa áhugasamir tíma þar til á morgun, til að skila inn hugmyndum og tilboðum.

Húsið er í eigu Akureyrarbæjar. Þjóðskáldið, séra Matthías Jochumsson, lét reisa Sigurhæðir árið 1903. Það er einlyft timburhús með risi. Húsið stendur á steinhlöðnum kjallara og miðjukvistir með risþaki eru á vestur- og austurhlið. Viðbyggingar eru við þrjár húshliðar, anddyri með valmaþaki við norðurstafn, inngönguskúr með skúrþaki við bakhlið og forstofa með valmaþaki við suðurstafn, að því er segir á heimasíðu Akureyrarbæjar.

Húsið er friðað skv. lögum um menningarminjar og verður starfsemi í húsinu að samræmast þeim kvöðum sem því fylgja og vera þess eðlis að ekki mæði of mikið á því. Ekki verður heimilt að búa í húsinu.

Áhugasamir þurfa að skila inn greinargerð þar sem m.a. kemur fram, auk leiguupphæðar:

  • Hvaða starfsemi fyrirhuguð er í húsinu
  • Menningarlegt vægi starfseminnar og tenging við sögu hússins
  • Hvernig fjármögnun verður háttað

Stjórn Akureyrarstofu, sem fer með málið, hefur tilkynnt að við yfirferð á framlögðum hugmyndum og tilboðum mun fyrirhuguð starfsemi og menningarlegt vægi gilda 50% af mati og tilboð um leigufjárhæð 50%. 

Húsið verður leigt til fjögurra ára með möguleika á framlengingu samnings í önnur fjögur ár.