Hringveginum við Jökulsá á Fjöllum lokað

Hringveginum við Jökulsá á Fjöllum hefur verið lokað vegna aukinnar óvissu og upplýsinga frá vísindamönnum um einhverjar breytingar á hegðun árinnar. Þetta var tilkynnt á Facebook síðu lögreglunnar rétt í þessu.

 

Lokunarpóstar eru á hringveginum, við Kröfluafleggjara að vestan og vestan við Vopnafjarðarafleggjara að austan. Allri umferð um Mývatnssöræfi er því beint um norðausturströndina, Húsavík, Þórshöfn og Vopnafjörð. Ekkert verður ákveðið með opnun vegarins í bráð en að minnsta kosti er ljóst að hann verður ekki opnaður í dag, skv. upplýsingum lögreglu.

 

Akureyringar og aðrir ferðalangar verða því að hafa vaðið fyrir neðan sig eigi þeir brýnt erindi austur á land í dag og gefa sér meiri tíma í ferðalagið en venjulega.