Mjög kalt gæti orðið í Eyjafirði á morgun
Töluverðu frosti er spáð víða næsta sólarhringinn, einkum inn til landsins og mjög kalt gæti orðið frammi í Eyjafirði, að sögn Einars Sveinbjörnssonar veðurfræðings.
„Staðspárnar fyrir Akureyri eru mjög misvísandi. Það gerir legan og hvað stutt er annars vegar til sjávar og hins vegar hárra fjalla,“ sagði Einar við Akureyri.net í morgun. Einar rekur Veðurvaktina og fjallar ítarlega dag hvern um veður og loftslag á vefnum blika.is.
Norðanátt og snjókoma hefur verið í Eyjafirði síðasta sólarhringinn en úrkomunni linnir senn. „Norðanáttin gengur að fullu niður í nótt og þá tekur við hægur landvindur. Nái að gera heiðríkju verður kaldast við þær aðstæður. Trúlega verður 9 til 12 stiga frost á morgun á Akureyri, en líkast til meira frammi í Eyjafirði, frostið gæti farið í 15 til 17 þar. Annars er þetta mikið undir vindinum komið. Smá gola er næg til að hræra upp í mestu kuldapollunum, “ segir Einar.