Fuglaskoðun fyrir fjölskylduna hjá Ferðafélaginu

Nú er mikið að gera hjá fiðruðu vinum okkar, fuglunum. Allflestir eru farfuglarnir komnir heim til Íslands og komnir á fullt í vorverkin. Ferðafélag Akureyrar hefur boðið upp á fuglaskoðunarferð fyrir fjölskyldur á þessum tíma undanfarin ár, og næstkomandi miðvikudag, þann 22. maí, verður farið saman út í náttúruna með sjónauka og forvitnina að vopni. 

Það eru þeir Jón Magnússon og Sverrir Thorstensen, fuglaáhugamenn með meiru, sem sjá um fararstjórn í ferðinni, en lagt verður af stað frá FFA, Strandgötu 23 á einkabílum kl 17.00. Ferðafélagið óskar eftir því að fólk skrái sig í ferðina á heimasíðu félagsins. HÉR er skráning.

Áfangastaður er Kristnestjörn í Eyjafirði og þáttaka í ferðinni er ókeypis.