Eygló er íþróttamaður ársins – Tryggvi þriðji

Eygló Fanndal Sturludóttir, lyftingakona úr Lyftingafélagi Reykjavíkur, er íþróttamaður ársins 2025. Gísli Þorgeir Kristjánsson, handboltamaður í Magdeburg, varð annar og Tryggvi Snær Hlinason, körfuboltamaður úr Bárðardal sem hóf ferilinn með Þór, varð í þriðja sæti í kjörinu að þessu sinni. Tryggvi, sem var nú í þriðja skipti á meðal 10 efstu í kjörinu, hafði áður lent í 9. og 10. sæti.

Vert er að geta þess að Baldvin Þór Magnússon, hlaupari í Ungmennafélagi Akureyrar, lenti í 17. sæti í kjörinu en alls hlutu 24 íþróttamenn stig. Þá fékk kvennalið KA í blaki eitt stig í kjöri liðs ársins.

Þetta var í 70. skipti sem Samtök íþróttafréttamanna kjósa íþróttamann ársins og mikið var um dýrðir í gærkvöld í Silfurbergi, í menningarhúsinu Hörpu í miðborg Reykjavíkur.

• Þjálfari ársins var kjörinn Ágúst Þór Jóhannsson sem stýrði kvennaliði Vals í handknattleik.
• Kvennalið Vals í handknattleik er lið ársins enda varð það bæði Íslandsmeistari og Evrópubikarmeistari; varð fyrst íslenska kvennaliðið í hópíþrótt sem verður Evrópumeistari.

Í hófinu, sem Samtök íþróttafréttamanna og Íþrótta- og Ólympíusamband Íslands (ÍSÍ) halda í sameiningu var íþróttakonu og íþróttakarli hvers sérsambands afhent verðlaun sín, og ÍSÍ heiðraði að auki tvo einstaklinga:

• Jón Arnar Magnússon, fyrrverandi frjálsíþróttakappi, var tekinn í Heiðurshöll ÍSÍ. Jón Arnar, íþróttamaður ársins 1995 og 1996, er sá 27. sem hlotnast sá heiður. Nánar um Jón Arnar hér á vef ÍSÍ.
• Bjarni Malmquist Jónsson, sem starfað hefur fyrir Umfélagið Vísi og Ungmennasambandið Úlfljót, var útnefndur Íþróttaeldhugi ársins 2025. Nánar um hann hér á vef ÍSÍ.

• Á vef RÚV má sjá ýmislegt um kjörið og hófið í gærkvöld: Íþróttavefur RÚV.

Íþróttamaður ársins 2025

Hér má sjá hvaða íþróttamenn fengu stig í kjöri íþróttafréttamanna. Allir 30 félagar í Samtökum íþróttafréttamanna tóku þátt í kjörinu að þessu sinni og mest var hægt að fá 600 stig.

1. Eygló Fanndal Sturludóttir, lyftingar – 532 stig
2. Gísli Þorgeir Kristjánsson, handknattleikur – 458 stig
3. Tryggvi Snær Hlinason, körfuknattleikur – 211 stig
4. Dagur Kári Ólafsson, fimleikar – 143 stig
5. Glódís Perla Viggósdóttir, knattspyrna – 142 stig
6. Hákon Arnar Haraldsson, knattspyrna – 115 stig
7. Jón Þór Sigurðsson, skotfimi – 73 stig
8. Snæfríður Sól Jórunnardóttir, sund – 65 stig
9. Hildur Maja Guðmundsdóttir, fimleikar – 59 stig
10. Ómar Ingi Magnússon, handknattleikur – 51 stig
11. Gunnlaugur Árni Sveinsson, golf – 47 stig
12. Hanna Rún Óladóttir Bazev og Nikita Bazev, dans – 42 stig
13. Cecilía Rán Rúnarsdóttir, knattspyrna – 38 stig
14. Albert Guðmundsson, knattspyrna – 35 stig
15. Thea Imani Sturludóttir, handknattleikur – 33 stig
16. Viktor Gísli Hallgrímsson, handknattleikur – 32 stig
17. Baldvin Þór Magnússon, frjálsíþróttir – 30 stig
18. Konráð Valur Sveinsson, hestaíþróttir – 26 stig
19. Elvar Már Friðriksson, körfuknattleikur – 23 stig
20. Hólmfríður Dóra Friðgeirsdóttir, skíði – 17 stig
21. Elín Klara Þorkelsdóttir, handknattleikur – 12 stig
22. Ragnhildur Kristinsdóttir, golf – 2 stig
    Jóhann Berg Guðmundsson, knattspyrna – 2 stig
    Thelma Aðalsteinsdóttir, fimleikar – 2 stig

Þjálfari ársins 2025 – þessir fengu stig í kjöri íþróttafréttamanna:

1. Ágúst Þór Jóhannsson, þjálfari kvennaliðs Vals í handbolta – 97 stig
2. Dagur Sigurðsson, þjálfari karlalandsliðs Króatíu í handbolta – 71 stig
3. Heimir Hallgrímsson, þjálfari karlalandsliðs Írlands í fótbolta – 38 stig
4. Einar Jónsson, þjálfari karlaliðs Fram í handbolta – 24 stig
5. Freyr Alexandersson, þjálfari karlaliðs Brann í fótbolta – 15 stig
6. Baldur Þór Ragnarsson, þjálfari karlaliðs Stjörnunnar í körfubolta – 11 stig
7. Sigurbjörn Bárðarson, landsliðsþjálfari í hestaíþróttum – 7 stig
8. Ingi Gunnar Ólafsson, lyftingaþjálfari – 4 stig
9. Sölvi Geir Ottesen, þjálfari karlaliðs Víkings í fótbolta – 3 stig

Lið ársins 2025

1. Valur – kvennalið í handbolta – 123 stig
2. Breiðablik – kvennalið í fótbolta – 64 stig
3. Fram – karlalið í handbolta – 44 stig
4. Íslenska landsliðið í hestaíþróttum – 22 stig
5. Stjarnan – kvennalið í hópfimleikum – 12 stig
6. Víkingur – karlalið í fótbolta – 3 stig
7. Karlalandslið Íslands í handbolta – 1 stig
   KA – kvennalið í blaki – 1 stig